السلام عليكم.. بما أن الآن هي فترة التقديم في الجامعات لخريجين وخريجات الثانوي، قررت اني أعمل هذا الفايل لتعرفوا كل ما هو مهم عن جامعة الملك سعود للعلوم الصحية وخصوصاً عن السنة التحضيرية💡.
أنا طالبة في جامعة الملك سعود للعلوم الصحية/فرع جدة من دفعة ١٤٣٨هـ /٢٠١٨م (batch 8, 👨🏻 batch4👩🏻) خلصت تحضيري هذي السنة والحمدلله تخصصت طب وجراحة وبما أن أغلب الاسئلة اللي بتجيني كيف قدرتي؟ وايش سويتي؟ وهل فعلاً انو الجامعة "ضغط" زي مابنسمع؟ وهل لازم اكون مرة بيرفكت في الانقلش وايش تنصحي؟ حأتكلم هنا بشكل مفصل عن تجربتي الشخصية والنقاط التالية بدون مبالغة وان شاءالله يكون شامل لكل شيء ويجاوب عن كل تساؤلاتكم✨:
- التسجيل والقبول ✍🏼
- الاسئلة الشائعة❓
- الاسئلة الشائعة❓
- تجربتي الشخصية👩🏻⚕️:
🔹 اللغة الانقليزية.
🔹رأيي ونصيحتي.
- نظام الدراسة والمواد لسمستر١ و٢ (نبذة عن محتواها ونصائح عامة وروابط مفيدة) 📚
🌟 الملف مقسم كما ذكرت فوق لسهولة الوصول للنقاط المُراد الإطلاع عليها🌟.
_________________________________________________________________
التسجيل والقبول ✍🏼
🔹 معلومة مهمة: جامعة الملك سعود بن عبدالعزيز للعلوم الصحية ( اختصارها KSAU-HS ) وتعرف بجامعة الحرس لها ٣ فروع في الرياض وجدة والأحساء وخاصة فقط بالتخصصات الصحية👨🏻⚕️👩🏻⚕️ وهي مختلفة تمامًا ومنفصلة عن جامعة الملك سعود بالرياض التي تشمل جميع التخصصات.
🔹 القبول لخريجي نفس المدينة التي بها فرع الجامعة.
🔹شرط القبول للمسار الموحد أن تكون سنة التخرج نفس سنة التقديم، وللتمريض (بنات فقط) مسموح التقديم بشرط ما يكون عدا أكثر من ٣ سنوات من سنة التخرج.
🔹شرط للقبول أن تكون شهادة الثانوية العامة (علمي) لاتقل عن ٩٠٪
🔹 الجامعة حكومية وتقبل فقط السعوديين ولا يوجد بها سكن للطلاب ويوجد تأمين طبي، ويمكن
للطالب/ة الغير سعودي/ة من أم سعودية التقديم أيضاً ولكن يجب التواصل مباشرة مع عمادة القبول في فترة التقديم على البريد الإلكتروني dar@ksau-hs.edu.sa .
🔹 أول خطوة هي متابعة مواعيد التسجيل وغالباً تكون في بداية شهر شوال وسيتم الإعلان عنها في تويتر على هذا الحساب @KSAU_Admission
هذي هي مواعيد التقديم لسنة ٢٠١٨-٢٠١٩: *انسخوا الرابط في قوقل أو تويتر*
🔹 التقديم يكون إلكتروني عن طريق موقع الجامعة👇🏼: (تعبئة البيانات المطلوبة)
🔹سوف يُطلب منكم ترتيب رغباتكم إما مسار موحد (uppp) أو تمريض( bnur ). *سأتكلم عنها لاحقاً👇🏼* ، بعد اخر خطوة سيتم تزويدكم باسم مستخدم وكلمة مرور.
🔹 القبول في إحدى المسارين يعتمد على الموزونة وطريقة حسابها كالتالي ٤٠٪ تحصيلي، ٣٠٪ قدرات، ٣٠٪ ثانوي ، هذا البرنامج مفيد جداً اختار/ي الجامعه وادخل/ي درجاتك وهو يحسبها UniCal
🔹 كيف أعرف إني انقبلت؟ بعد فترة التقديم تقريبا بأسبوع يتم الإعلان عن نتائج الترشيح على دفعات من خلال الدخول على الرابط الذي سيتم الإعلان عنه على حساب الجامعة في تويتر، وغالبًا هي أول جامعة تطلع نتائج القبول قبل جامعة الملك عبدالعزيز وجدة وغيرها.
- إذا تم ترشيحكم سيظهر لكم موعد لمقابلة شخصية. حضور المقابلة شرط أساسي للقبول لازم تحضروها لكي يتم تأكيد تسجيلكم في الجامعة وتكون تقريبا بعد أسبوع-أسبوعين من التقديم.
🔴اذا ماحضرتوا المقابلة حتضيع عليكم فرصة القبول فبالتالي لو أحد غير رأيه ومايبغا الجامعة كل اللي عليه انه يسحب على المقابلة.
- حيطلبوا منكم متطلبات تجيبوها معاكم يوم المقابلة ومن ضمنها صور شخصية، وثيقة التخرج الأصلية، وشهادة الثانوي وحياخذوها منكم، ومايمديكم تسترجعوها وتسحبوا من الجامعة إلا لما تبدأ الدراسة وبكذا حتضيع عليكم فرصة التسجيل في جامعة أخرى؛ فعشان كذا خليكم واثقين من البداية في قراركم لأنه مافي فرصة للرجوع👌🏼 *فيه ناس راحوا الجامعة وقدروا يسترجعوها ولكن مو مضمون أبداً*
بعد المقابلة بنفس اليوم يتم تسليمك إشعار القبول وهو ما يؤكد ويوثق قبولك ٩٥٪ كطالب/ة مستجدة👍🏼
🔹 بعد المقابلة حيكون فيه اختبار انقليزي لتحديد المستوى وماله أي تأثير على القبول أو الدراسة، يعني سواء النتيجة كانت ١٠٠ من ١٠٠ او ٤٠ من ١٠٠ كلكم حتدرسوا من البداية لأن مواد الانقليزي إجبارية ولا يمكن معادلتها بشهادة توفل أو آيلتس وغيرها. ممكن يكون الاختبار بنفس يوم المقابلة وممكن يحددوا لكم موعد آخر. الفائدة من الاختبار فقط لتقسيم الطلاب في الكلاسات بحيث يكون مستواهم مختلف من عالي ومتوسط وضعيف لغرض ان الطلاب يساعدوا ويتعلموا من بعضهم.
🔹 آخر شيء حيرسلوا لكم موعد فحص في المستشفى على الجوال والإيميل. الفحص عبارة عن زيارتين. الزيارة الأولى كانت في العيادات الخارجية (سحب دم💉) والزيارة الثانية في عيادة الجامعة ( يكون فيه دكتور أو نيرس يسوولك فحص نظر وقياس وزن وطول ويسألك كم سؤال+ تطعيم). نتائج التحليل حتظهر اذا كان عندك مرض معدي أو لا لاسمح الله واذا الشخص أحتاج علاج يصرفوا له أدوية مثل فيتامين د وغيرها والبعض عملوا لهم أشعة.
وبكذا بعد اجتياز كل هذي المراحل، مبروك🎉! انت/ي رسمياً طالب/ة في جامعة الملك سعود للعلوم الصحية👍🏼
_________________________________________________________________
الاسئلة الشائعة❓
♦️هل يختلف النظام بين الفروع (الرياض،جدة،الأحساء)؟
النظام والدراسة نفسه في كل الفروع ولكن المختلف:
١ـ التخصصات 👨🏻⚕️👩🏻⚕️:
◻️ جدة: متاح فيها طب وجراحة، علوم طبية تطبيقية (أبلايد) وهي تتفرع إلى ( علاج وظيفي، علاج تنفسي، علوم مختبرات إكلينيكة، خدمات طبية طارئة، تقنية التخدير، علوم أشعة، تغذية إكلينيكية)، وتمريض للبنات فقط.
◻️الأحساء: متاح فيها علوم طبية تطبيقية، والتمريض للبنات فقط.
◻️الرياض: مثل جدة ولكن متاح فيها تخصصات إضافية غير موجودة بفرعي جدة والأحساء مثل الصيدلة وطب الأسنان وكلية الصحة العامة والمعلوماتية الصحية.
✨ملاحظة: مستقبلاً ممكن أن تضاف تخصصات أخرى في باقي الفروع وسيتم الإعلان عنها على حساب الجامعة في توتير @KSAU_Admission وممكن الإطلاع عليها من خلال موقع الجامعة الرسمي وهو
الطريقة: البرامج الأكاديمية > برامج البكالوريوس > على اليمين توجد خيارات (الكليات في جدة، الرياض، الأحساء).
🔘 نُبذة عن تخصصات العلوم الطبية التطبيقية تجدوها هنا🌟👇🏼:
https://twitter.com/TAlmeqbli/status/1004564572039254016?s=20
✨معلومة: دراسة التمريض والأبلايد ٥ سنوات: سنتين تحضيري وسنتين تخصص وسنة امتياز، دراسة الطب ٧ سنوات: سنتين تحضيري ٤سنوات تخصص وسنة امتياز.
التخرج يكون قبل الامتياز فيهم كلهم وطلاب الطب يتخرجوا بمسمّى دكتور، وطلاب العلوم الطبية يتخرجوا بمسمّى أخصائي.✨
٢ـ نسب القبول📊
غير ثابتة وتختلف كل سنة على حسب الدفعة، سأذكر هنا النسب التقريبية لدفعتي ١٤٣٨-١٤٣٩هـ :
◻️جدة:
▪️المسار الموحد: طالبات👩🏻⚕️ أقل موزونة قُبلت لجدة ٩٠.٥ وغالباً توقف في التسعينات، وبنات مكة ٩٤.
طلاب 👨🏻⚕️جدة وقفت على ٨٤، ومكة ٨٩.
▪️ التمريض للبنات فقط👩🏻⚕️ ويتراوح بين ٧٨-٧٩
◻️الرياض: لاتوجد نسبة ثابتة ولكن غالبا تتراوح بين ٨٨-٨٤ للبنات👩🏻⚕️، ٨١-٧٧ للأولاد👨🏻⚕️.
◻️الأحساء:
▪️علوم طبية تطبيقية حول ال٨٥ للبنات👩🏻⚕️ ، وللأولاد👨🏻⚕️ توصل ل٧٩ تقريباً
▪️التمريض للبنات فقط👩🏻⚕️ وتتراوح بين ٨١-٨٣.
٣ـ نسب التخصيص📍
تختلف كل سنه بحسب الدفعه ويتم الإعلان عنها عن طريق حساب الجامعة في تويتر @uppp_ksau وفي هذا الرابط إحصاءات التخصيص بالجامعة خلال الأربع سنوات الماضية👇🏼:
وهنا إحصاءات تخصيص الكليات للعام الدراسي ٢٠١٧-٢٠١٨ (هذا العام) بالرياض وجدة:
https://twitter.com/uppp_ksau/status/1004734420035743751?s=21
✨ملاحظة: نسب قبول الطب بجدة قلت عن العام الماضي بسبب زيادة عدد المقاعد للطالبات من ٥٠ مقعد أصبحت ٧٥ مقعد وأقل معدل تم قبوله هو ٤.٨١، وكذلك للطلاب أصبحت ١٢٥ مقعد وأقل معدل تم قبوله هو ٤.٣٩.
✨ملاحظة: نسب قبول الطب بجدة قلت عن العام الماضي بسبب زيادة عدد المقاعد للطالبات من ٥٠ مقعد أصبحت ٧٥ مقعد وأقل معدل تم قبوله هو ٤.٨١، وكذلك للطلاب أصبحت ١٢٥ مقعد وأقل معدل تم قبوله هو ٤.٣٩.
COM: College of medicine (الطب)
CAM : College of Applied med science (العلوم الطبية التطبيقية)
COD: college of Dentistry (طب الاسنان)
COP : College of pharmacy (الصيدلة)
HIS : ( كلية الصحة المعلوماتية)
♦️ هل بالفعل يوجد سنتين تحضيرية؟
السنة الأولى هي السنة التحضيرية (سنة المنافسة)، والسنة الثانية تسمى سنة إعدادية للتخصص قبل الذهاب للكلية التي تخصصت بها.
السنتين هذه حتكون دراستها في كلية العلوم والمهن الصحية (اختصاراً تعرف ب كوشب COSHP ) وبعدها كل طالب وطالبة ينتقلوا لكليات تخصصاتهم.
♦️كيف نظام التسكين ومتى يتم تخصيصي؟
◻️جدة: يوجد مسارين مسار موحد وتمريض. إذا تم قبولك تمريض فكذا خلاص انت تخصصت/ي👍🏼.
واذا تم قبولك مسار موحد أولاً دراسة سنة تحضيرية وعلى أساس معدل الترمين فقط يتم تخصيصك إما طب وجراحة أو علوم طبية تطبيقية.
اذا تم قبولك طب وجراحة فكذا خلاص انت تخصصت/ي👍🏼 ولكن اذا تم قبولك علوم طبية أولا دراسة ترم اخر (سمستر٣) وبعدها يتم تخصيصك في فرع من العلوم الطبية التطبيقية سبق وذكرتها فوق (مختبرات، أشعة...) بناء على رغباتك ومعدل ال٣ سمسترات.
✨ملاحظة: تخصيصك في الكليات يعتمد على معدل الجامعة فقط من ٥ وماله علاقة بالثانوي.✨
◻️فرع الرياض نفس نظام جدة ولكن بها مسارات أخرى مثل طب الأسنان والصيدلة وسيتم تخصيصك بناء على رغباتك ومعدل السنة التحضيرية.
◻️فرع الأحساء مختلف فالتخصيص مباشر ويتم قبل بداية السنة التحضيرية، من فترة التقديم يتم تخصيصك بناء على الموزونة والمقابلة مهمة جداً جداً سأتكلم عنها بالتفصيل👇🏼.
♦️ كيف طبيعة المقابلة وهل الجو يوتر؟
غرفه فيها شخص أو شخصين ويسألوكم كم سؤال سطحي. ممكن لو شدّهم الموضوع يدخلوا في التفاصيل زي مثلا لو سألوا عن إنجازاتك وعجبهم شيء. والجو طبيعي جداً ومُريح.
♦️ايش الاسئلة اللي ممكن تجيني؟
المقابلة تكون بالعربي بس ممكن سؤال او اثنين بالانقليزي.
▪️ عرف/ي عن نفسك بالانقليزي وأحياناً عربي.
*انا شخصياً طلبوا مني اتكلم بالانقليزي، اتكلمت شوية وبعدها طلبت منهم اني اكمل بالعربي ووافقوا
لي👍🏼*
▪️ ايش هواياتك ؟
▪️ليه اخترت/ي هذا التخصص؟
▪️ ايش تعرف/ي عن التخصص؟
▪️هل لك اقارب يشتغلوا ب المجال الصحي؟
▪️للبنات: لو زوجك رفض انك تتوظفي بمستشفى ايش بتكون ردة فعلك؟
▪️ ايش تعرف/ي عن الجامعة؟
▪️ اذا قبلناك بتخصص غير رغبتك الاولى عادي؟
▪️ كيف لغتك الانقليزيه؟
▪️ممكن يسألوا عن أعمال تطوعية سبق وشاركت/ي فيها ف حاولوا تجهزوا لهذا الموضوع.
▪️ايش خطتك البديلة لو ما تم قبولك في الرغبة الأولى؟
▪️ماهي ردة فعلك لو في يوم من الأيام المريض مات في يدك؟
▪️يسألوا عن مكان السكن وعن توفر المواصلات وهل بباص أو سائق شخصي.
▪️ماهي انجازاتك؟ وما طموحاتك؟
▪️التخصصات الصحية فيها اختلاط هل أهلك موافقين أم معارضين؟
▪️اذكر/ي نقاط القوة والضعف بشخصيتك؟
▪️هل تعاني من أي مرض؟ وهل في العائلة عندكم مرض وراثي؟
▪️هل أحد من أهلك مصاب بأي مرض مثل السكر والضغط؟
▪️ايش ناوي/ة تتخصصي تخصص دقيق ؟
♦️هل ممكن يتم رفضي في المقابلة؟
غالباً لا اذا جات رسالة المقابلة فهذا يعني انك ان شاءالله ٩٥٪ مقبول/ة👍🏼 إلا اذا كان فيك مرض معدي لاسمح الله أو شي يعيق من قبولك.
🔴ولكن الوضع في الأحساء مختلف تماماً فالقبول يعتمد بشكل كبييرر جداً على المقابلة يعني ممكن طالبة موزونتها ٩٠ تنرفض وطالبة أخرى موزونتها ٨٨ يتم قبولها بسبب الأداء في المقابلة.
وممكن يسألوا في المقابلة: ▪️ لو رفضناك ايش بتكون ردة فعلك؟
هذي بعض النصائح من أختنا أمجاد طالبة في فرع الأحساء👇🏼:
وإذا حابين تستفسروا أكثر هذا حسابها في تويتر حتكون سعيدة جداً بمساعدتكم💕 @2mQAd
▪️ لما يسألوا عن اللغة الانقليزية بينوا أن اللغه مو عائق وانكم قادرين تتعلموها وتطوروا من نفسكم بوقت قصير واذكروا تجارب من قبلكم انهم قدروا وأنا ان شاءلله أقدر زيهم🌟
▪️مهم تذكروا النادي الطلابي وانكم تتابعوا الأنشطه وهذا الجانب من الجامعه حببكم فيها
▪️أظهروا رغبتكم وتمسككم بالجامعة اولاً ثم ب التخصص
▪️حاولوا توضحوا طموحاتكم حتى لو ما سألوكم وانكم حتضيفوا للجامعة شيء كبير وتضعوا بصمتكم
▪️اذا شافوك جداً نشيط/ة ورغبتك واضحه بالجامعة والتخصص راح تنقبل/ي بإذن الله وشيء مهم بعد الثقه الثقه👌🏼
♦️ هل نتائج التحليل يمكن أن تعيق قبولي؟
اذا كان فيك مرض لاسمح الله سيتم علاجك و قبولك ان شاءلله ولكن ممكن يستبعدوا الطالب أو الطالبة اذا وجدوا به/ا مرض معدي لاسمح الله أو حالات أخرى.
ضعف النظر وروماتزم العظام والأمراض الخفيفة غير المعدية لا تعيق القبول.
♦️كم عدد المتقدمين للجامعة؟
كثييرر جداً وعلى دفعتي كان تقريبا حول ٧ آلاف متقدمة واكثر وتم قبول ٢٥٠ تقريبا بالنسبة للطالبات فرع جدة مسار موحد. وماعندي علم عن الباقي.
♦️ماهو المسار الثاني (srteam 2)؟
يقصد به برنامج الطب لما بعد البكالوريوس. يعني بعد التخرج من كلية العلوم الطبية التطبيقية يمكنك التقديم لدراسة الطب البشري ومدة الدراسة ٥ سنوات ونصف.
♦️مالذي يميز جامعة الحرس عن غيرها😍؟
▪️نظام الانقليزي جداً مكثف ويطلعك حرفياً فاهمة ويطور مهاراتك اللغوية بشكل كبيييرر(الكلام، الكتابة، الفهم والاستيعاب وغيرها)👍🏼، ولكن في الوقت نفسه نظام الانقليزي قد يكون مُتعب للبعض وهو أكثر مايخيف المستجدين والمستجدات وسأتكلم عنه لاحقاً.
▪️بيئة الجامعة جداً جميلة ومُريحة وبها كل مايعين ويساعد الطالب (مكتبة وكتب دراسية للاستعارة وساعات مكتبية للتواصل مع الدكاترة وغرفه ترفيهية وعيادة وأيضا السبورات الحديثة والتقنية وغيرها).
▪️حتلاحظوا ان الطلاب ملمومين حول بعض بحكم ان الأعداد قليلة وسهل جداً انك تكوّن/ي علاقات جديدة، ونخبة الطلاب منجد ماشاءلله كل أحد تتعرفوا عليه يتميز بحاجة✨وهذاحيحببكم في الجامعة❤️
▪️جميع التخصصات صحية فإذا لاسمح الله لم يتم قبولك في رغبتك الأولى مازالت لك الفرصة انك تختار/ي تخصص طبي آخر.
▪️النادي الطلابي حاجة تتميز بيها جامعتنا، يقدم أنشطة ترفيهية، تعليمية وغيرها
▪️سهل انك توصل/ي للجهات العليا كعميد/ة الكلية مثلاً او انك توصلّ/ي صوتك.
▪️*عن تجربتي* تعامل المسؤولات جداً متعاون ومتفهمين ويحاولوا يساعدوا بكل مايقدروا.
▪️الجامعة معتمدة وسمعتها جداً كويسة.
♦️ما هي سلبيات جامعة الحرس؟
▪️الضغط، وخصوصاً سمستر٢ والسنة التحضيرية بشكل عام لأنها هي سنة المنافسة والرغبة بالطب جداً عالية. وحأتكلم بالتفصيل عن الضغط اللي بنواجهه.
▪️الدراسة قوية فاللي يدخلها لازم يكون صبور جداً وعنده إصرار.
▪️يفضّل ان مستوى الانقليزي يكون عالأقل متوسط أو أعلى، الكلام مو تحبيط ولكن فعلاً فيه بنات اعرفهم شخصياً مستواهم العلمي ممتاز جدداً ولكن الانقليزي أتعبهم شوية، وكان سبب في عدم قبولهم برغبتهم الأولى.
▪️*من تجربتي في جدة طالبات* الأكل شوية سيء في كوشب وأغلبه معجنات🥐، ولكن وعدونا انه حيتحسن ان شاءلله. الحل اننا كنا نروح لكلية الطب نشتري من عندهم أو نطلب من برا وفيه كثير مندوبين يوصلوا للجامعة.
♦️ماهي أوقات الدوام⏱؟
سمستر١: ٣أيام في الأسبوع من ٩ إلى ١، ويومين من ٩-٤
سمستر٢: يختلف على حسب جدولك ولكن غالباً يكون يومين من ٩-١، و٣ أيام من ٩-٤ وممكن يكون عندكم يوم الدوام يبدأ من ١٠.
♦️ كم ياخذ الطريق؟ (جدة)
على حسب موقع بيتك، ومن الشمال (أبحر مثلاً) تقريباً ٤٥د بدون زحمة.
♦️هل فيه باصات توصل للجامعة من مكة؟ موجود كثير👍🏼.
♦️مالفرق بين جامعة الملك عبدالعزيز وجامعة الحرس؟
هذا رابط سووه بنات من الجامعتين الله يعطيهم العافية يوضح الفروقات الأساسية👇🏼:
https://drive.google.com/file/d/1xHRMJ3SMlV3ONjs3L2y-tL9EunjAKwaF/view
https://t.co/9yYy0Qy1V9
https://t.co/9yYy0Qy1V9
واذا حابين تتواصلوا معاهم في آخر الفايل موجودة حساباتهم في تويتر 💕.
♦️سؤال مهم وكثير يتكرر: هل عندكم بونس ( مثال: لو الاختبار من٣٠ يجيبوا لك لنفترض ٣٥ سؤال، ال٥الإضافيه هي بونس بحيث لو غلطت/ي في سؤال، البونس يعوّض عن الغلط) ؟
لا مافي أبداً 👎🏼
♦️كيف نظام الغياب والتحضير؟
ـ مواد الانقليزي تحضير بالأسامي: وعلى كل غياب فيه نسبة درجات، وبعد غياب ٣ كلاسات تجيكم رسالة إنذار١ وبعده إنذار ٢ واذا رسلوا انذار٣ بعده يكون حرمان.
ـ المواد العلمية التحضير يكون بورقة تمر على الطلاب، لايوجد فيها نقص درجات على الغياب ولكن لازم حضورك مايكون أقل من ٧٥٪ من المادة ولا يجيكم حرمان.
♦️هل بالفعل خريجي وخريجات جامعة الملك سعود للعلوم الصحية قبولهم مضمون في مستشفى الحرس؟
غير صحيح، مجرد إشاعة!
♦️كم لازم اجيب قدرات وتحصيلي وثانوي عشان أضمن دخولي في الحرس؟
يفضّل - من رأيي- أن تكون الشهادة الثانوية لا تقل عن ما فوق ٩٦٪ ، القدرات والتحصيلي ٨٨ وفوق.
أو بصورة أخرى الموزونة يفضّل أن تكون ٩١ وفوق (طالبات موحد، جدة) ولكن من الممكن طبعاً أن نسب القبول تكون أقل مما ذكرت في الفروع الأخرى.
♦️كم لازم يكون معدلي عشان أضمن إني أدخل طب؟
لايوجد معدل محدد لأن كل سنة يختلف ولكن تقريبًا فوق ال ٤.٩٠ ان شاءلله -من رأيي-.
♦️كم لازم أجيب في كل مادة عشان ما انقص عن الA+؟
٩٥ وفوق. ولو كل المواد A+ المعدل يكون ٥/٥، ولو مثلا مادة وحدة كانت A فالمعدل ينقص بحسب عدد الساعات للمادة.
♦️ايش يعني عدد ساعات؟
كل مادة في الجامعة لها عدد ساعات معينة. كل مازاد عدد الساعات حيزيد تأثير المادة على المعدل. كيف يعني؟
🔘مثال: مادة الReading في سمستر١ عليها ٥ ساعات، ومادة العربي عليها ساعتين.
طالبة نقصت في مادة الريدنق وكانت درجتها A ، وباقي المواد A+ > معدلها: ٤.٩٣
طالبة نقصت في مادة العربي وكانت درجتها A ، وباقي المواد A+ > معدلها: ٤.٩٧
♦️كيف يمكنني التقديم ونتيجة التحصيلي لم تعلن بعد؟
الجامعة تحصل على نتيجة التحصيلي والقدرات من مركز قياس مباشرة.
♦️ايش اللبس الموحد؟ ومن فين اشتريه؟
سمستر١ حتحتاجوا فقط سكراب واللون المسموح درجات الأزرق فقط+ سمستر٢ حتحتاجوا انكم تلبسوا لابكوت في المعامل.
أختنا تهاني طالبة تمريض بجدة اتكلمت عن هذا الموضوع في تويتر على هذا الرابط 👇🏼:
روان الصيدلاني الله يعطيها العافية عملت ملخص للمحلات الممتازة والماركات العملية في هذه التغريدة:
وهذا رابط مدونة الأخ سلطان:
♦️هل بعد ما أتخصص أقدر أغير تخصصي؟
لا الجامعة مافيها تحويل.
♦️هل أقدر أحول من جامعة ثانية لجامعة الحرس؟
لا. ولكن لتخصص التمريض تستطيعي التقديم كمستجدة واذا جاكي القبول تعملي اخلاء طرف من جامعتك بشرط مايكون عدا اكثر من ٣ سنوات على وثيقة التخرج.
♦️هل بعد ما أنتهي من دراسة السنة التحضيرية أقدر أحول لجامعة الملك عبدالعزيز؟
نعم وسيتم معادلة مادة الكيمياء والفيزياء والعربي ولكن لاتحسب درجاتك السابقة، يعني فقط يُكتب أنك تخطيت/ي هذه المادة. وبإمكانك أيضاً التسجيل كمستجد/ة.
من الممكن أن تتغير الأنظمة مستقبلًا بخصوص معادلة المواد.
♦️ هل أقدر أسجل في أكثر من جامعة👇🏼؟
♦️لو لاسمح الله رسبت في مادة ايش راح يسير؟ *الله يبعده عنكم ولكن للمعلومية فقط*
الجامعة مافيها صيفي، نظام الريسيت (اختبار الإعادة) بداله وهنا تهاني الله يعطيها العافية اتكلمت عنه👇🏼
✨معلومة: اختبار الريسيت يُحسب من ١٠٠، يعني الميدات لا تحسب ويتم تجاهلها. ومهما كانت النتيجة سواء ٩٠ او ٦٠ ف ستكون درجتك D✨
_________________________________________________________________
تجربتي الشخصية👩🏻⚕️ (فرع جدة) :
🔹 اللغة الانقليزية 🔹
♦️أنا خايف/ة من الانقليزي ومستواي مو مرة عالي.. هل مستوى الدراسة مرة صعب؟
منهج الانقليزي مكثف جداً ومهم مرة في جامعتنا ويستمر ل٣ أترام وكل مواد الانقليزي إجبارية ولا يمكن معادلتها. الانقليزي في جامعتنا مقسم إلى عدة مواد منفصلة (قرامر، رايتنق، ريدنق، لسننق) وكل مادة لها عدد ساعات معين، وللأمانة المناهج كانت مو مرة صعبة ولكن كنا نعاني من الاختبارات.. وحتلاحظوا في قسم المواد ان الانقليزي في سمستر١ عليه ١٤ ساعة⏱! فالمعدل وخصوصاً السمستر الأول يعتمد اعتماد كلي على الانقليزي. لازم تحطوا في بالكم ان المناهج ماحتبدأ معاكم من الصفر حتبدأوا من مستوى متوسط إلى عالي والمسز من ثاني يوم في الجامعة حيبدأوا كلاسات ويشرحوا بالانقليزي ( أغلب مسز الانقليزي أجانب أصلاً) فبالتالي لازم تكونوا مستعدين ومهيئين نفسكم👍🏼. للأسف ان كثير بنات ماكانوا يعرفوا عن هذا الشيء وهوا كان السبب في تعثر البعض وكان الموضوع بالنسبة لهم صعب ودبل عن البقية بسبب اللغة.
حتواجهوا صعوبات ايوا وخصوصًا في البداية وشيء طبيعي جدًا لأنه مجتمع جديد ومرحلة مختلفة.. ممكن النتيجة في البداية ماتعجبكم وممكن تتحطموا وتنهاروا وتبكوا بس لا تخلوا الشيء دا يحطمكم.. طبيعي جداً ان أول اسايمنت ممكن ماتجيبوا الدرجة الي تبغوها! واعرف ناس بدأوا أول اسايمنت ب B+ وانتهوا ب A+!😍 وممكن أول كويز ماتجيبوا الفل مارك ولكن حتكونوا عرفتوا كيف الطريقه وتشدوا حيلكم للجاي ومن هنا حتعرفوا كيف المفروض تذاكروا وايش تسووا👌🏼.. اشتغلوا على نفسكم وابذلوا كل جهدكم وروحوا للتيتشرز كل شوية عادي.. أي سؤال مهما كان بسيط وسخيف لا تترددوا! كيف حنتعلم لو ما سألنا؟ شيء مهم كمان عن تجربة لو المس شافتك مرة مهتمة ومرة بتتعبي أكيد حتساعدك ومنجد مرة حيكونوا متعاونااات معاكم. وحاجة حلوة كمان لو مثلاً لاسمح الله المس الي تدرسكم موعاجبتكم تقدروا تروحوا مكاتب المسز التانيين وتسألوهم ويشرحولكم.
طيب هل بعد ماقرأت هذا الكلام المفروض اني اخاف أكثر؟
1️⃣ أولاً أنا قلت الكلام اللي فوق مو لغرض التخويف والتحطيم وكلامي أبداً مايدل على انه شي تعجيزي، بس عشان أحطكم في الصورة وتكونوا عارفين كيف الوضع، فيه بنات كانوا يرسمولنا الصورة بشكل أسهل مما هو في الواقع وكانت النتيجة ان بعض البنات اتعثروا لأنهم ماكانوا مستعدين.
2️⃣ ثانياً: التيتشرز حيمشوا معاكم خطوة بخطوة في شرح المنهج وحيكونوا متعاونات جدااً. في مادة الرايتنق مثلاً محايجوا فجأة ويقولولكم يلا اكتبوا بارقراف! لا. مثلاً ممكن في البداية يطلبوا منكم تكتبوا سطرين أو ثلاثة واليوم الثاني تكملوا وهكذا.. وحتلاحظوا زي ما مادة القرامر مثلاً عبارة عن قواعد، الرايتنق كمان له قواعد وأنواع.
3️⃣ ثالثاً: الكلاسات مقسمة بحيث يكون فيها مختلف المستويات من ضعيف إلى عالي، وهذا شيء مفييدددد جداً، ليش؟ لأنكم حتحتاجوا لبعضكم وخصوصاً في الأسايمنت في مادة الرايتنق وشرح القواعد أو معاني الكلمات وغيرها. اذا مستواكم مثلا كان متوسط حتلاقوا ناس مرة شطار ومرة واو في الانقليزي وممكن أحياناً تحسوا بالظلم. لا تتحطموا ولا تستسلموا! بالعكس استفيدوا منهم ومن خبرتهم ولا تحطوا في بالكم أوه هيا أشطر مني أنا محا اقدر، لا! أعرف شخصياً بنات مرررة شطار في اللغة وماشاءلله اتوقع انهم عدوا السمستر الأول ب٥، ولكن في المواد العلمية سمستر٢ النتيجة مختلفة تماماً.. فالخلاصة من كلامي اجتهدوا واعملوا كللل اللي عليكم وابذلوا كل جهدكم وربنا ما حيضيع تعبكم بإذن الله ولا تسمعوا للمحطمين الي ييقولوا "الانقليزي شيء تعجيزي في جامعتنا" لو انه بالفعل تعجيزي كيف عدينا انا ودفعتي؟ وكيف اللي قبلنا عدوا؟🤔
4️⃣ رابعاً: السمستر الأول حيكون الانقليزي اكثررر شيء شاغلكم لأن أصلا ماعندكم غيره والثقافة والعربي، ممكن تجلسوا تذاكروا للكويز يوم كامل وتهلكوا نفسكم تدريبات و ووركشيت ولكن عن تجربة، حتلاحظوا ان كل هذا السمستر الثاني حيختفي وممكن توصلوا لمرحلة انكم تذاكروا كويز في طريق الصباح للجامعه😂! مع كثرة الكويزات اللي حتختبروها حتكونوا متعودين كيف حتجيكم وخصوصاً في مادة الرايتنق لأن أغلبه متكرر، ولكن مثلا مادة الريدنق والقرامر تحتاج لها مذاكرة ولازم تخصصوا لها وقت في اليوم اللي قبل الكويز.
5️⃣ خامساً: اختبارات الانقليزي كلها الغلط مايكون بنسبة كاملة من ١٠٠. كيف يعني؟ لو مثلا هذا الاختبار من ١٠٠ سؤال وعليه ٢٥٪، فكل ٤ أغلاط بنسبة وحدة. لو طالب مثلا غلط في ٨ اسئله حينقص بس نسيتين ونتيجته ٢٣٪.
بعكس المواد العلمية كل غلط بنسبة، فلو الاختبار من ٢٥ سؤال وعليه ٢٥٪ لو الطالب غلط غلطة وحدة حتكون نتيجته ٢٤٪، وبعض المواد الغلط ب ٠.٧٥ يعني درجة إلا ربع.
6️⃣ سادساً وأخيراً: الكلام الي قلته المفروض يعطيكم دافع أكبر انكم تستغلوا اجازتكم في تطوير وتنمية مهاراتكم اللغوية.. عندكم ٣ شهور استغلوها كويس😍👍🏼
♦️كيف أعرف هل مستواي كويس ولا لسا أحتاج أطور من نفسي؟
▪️جربوا تسمعوا مقاطع وفيديوهات انقليزية واسألوا نفسكم *طبعاً المقاطع ماتكون علمية أو موضوع معقد.. مواضيع بسيطة أو مثلا الأفلام والمسلسلات* : هل أنا فاهم/ة ايش قاعد يقول الشخص اللي قدامي؟ اذا ايوا ف ان شاءلله وضعك تمام✅، اذا لا ف كذا حتقولوا لنفسكم أنا لازم أتطور، ليش؟ لأن الشرح كله انقليزي لو انا مو فاهمة ايش المس قاعدة تقول كيف حأستوعب؟.
▪️طيب أنا أفهم الي أسمعه ولكن ما أعرف أتكلم بطلاقة وأركب جمل؟ مولازم هما حيعلموكم كيف تتكلموا وحيمشوا بالتدريج ماحيجوا فجأة ويقولوا يلا قدموا لنا برزنتيشن نقيّمكم عليه، لا! بالتدرييييج يعني مثلا أول شيء يعطوكم موضوع ووقت تفكروا وممكن تكتبوا في ورقة ويعملوا تدريبات بينك انتي وزميلتك الي جمبك ولازم تتكلموا.. بعد كذا ممكن تغير أماكنكم وتروحوا لشخص مختلف، وبعد فترة من التدريب تقدموا برزنتيشن كمجموعة وكل شخص يتكلم دقيقه فقط.. إلى ان توصلوا انكم تقدموا برزنتيشن كامل بنفسكم😍🌟.
▪️طيب بالنسبة للقراءة؟ اذا لغتي الانقليزية سيئة كيف حأفهم من الكتاب؟ طبعاً لازم تكونوا عارفين كيف تقرأوا وتستوعبوا ايش بتقرأوا وتفهموه.. ووللأمانة ماحيعلموكم كيف تقرأوا، حيعلموكم كيف تستوعبوا القطعه وتستنتجوا الفكرة الرئيسية وأنسب خاتمة وهكذا وكمان يعلموكم كلمات جديدة ومعانيها وهاذي اسمها vocabulary list. الكلمات المستخدمة في الشرح مو مرة صعبة وطبعاً في البداية ممكن تترجموا كل شيء في الصفحة وصراحة متعب الموضوع ولكن تدريجياً حتلاحظوا انكم ماتحتاجوا ترجمة أصلاً الا كم كلمة وهنا حتحسوا انكم فعلاً اتطورتوا وهذا كمان حتلاحظوه في المواد العلمية😍. ابدأوا بقصص تعليمية بسيطة واتدرجوا في المستويات. مكتبة جرير فيه قسم خاص للقصص التعليمية ومنها سلسلة اوكسفورد وغيرها كثير. كيف أعرف أنا أيت مستوى؟ اقرأوا الكلام الي يكون مكتوب خلف الكتاب.. اذا فاهمين كل شيء❌، اذا موفاهمين ولاشيء❌، اذا فاهمة شويه وكم كلمة لا✅.
▪️وآخر نقطة.. الكتابة✍🏼 نفس ماذكرت فوق "محايجوا فجأة ويقولولكم يلا اكتبوا برقراف! لا. مثلاً ممكن في البداية يطلبوا منكم تكتبوا سطرين أو ثلاثة واليوم الثاني تكملوا وهكذا إلى ان تكتبوا برقراف كامل وممكن يكون العمل في البداية جماعي.. وحتلاحظوا ان الرايتنق له قواعد وأنواع كثيرة." هاذي المادة ممكن تكون مُتعبة جداً لأنها تضم تقريباً أكثر المواد.. لازم يكون عندكم مجموعة فوكاب (كلمات وهي مادة الريدنق) عشان تقدروا تعبروا، وقرامر عشان تركبوا الجمل بطريقة صحيحة، ومهارات أخرى مثل ترابط الأفكار ببعضها وغيرها.
✨ملاحظة: حأتكلم في قسم المواد عن كل مادة ونبذة عن محتواها✨
♦️كيف أطور من نفسي؟
أمانةً أنا ماعندي خبرة مرة بهذا المجال ولكن أكثر شيء ساعدني الأفلام والمسلسلات تابعوها بترجمة انقليزية *على نتفلكس Netflix، أو بوبكورن popcorn time برنامج تحملوه في اللاب توب*.. وبكذا حتسمعوا وتقرأوا بنفس الوقت وهذا يطور مهارات كثير من ضمنها الفهم والفوكاب والقراءة. لازم تكون عندكم الأساسيات عالأقل وممكن انكم تدخلوا معهد يساعدكم في تعلم الأساسيات وبعد كذا تنطلقوا وتعلموا نفسكم بنفسكم👍🏼، معهد اوكسفورد وbritish council سمعت عنهم مدح كثير🌟.
فيه برامج في الجوال مثل voscreen + Duolingo ممكن تفيدكم👌🏼واذا حتسافروا حاولوا تتكلموا مع الأجانب، بمجرد ما انكم بتبحثوا عن كلمة عشان تعبروا بيها انتو كذا بتتطوروا👍🏼 وأهم شي الاستمرااار اتكلموا مع أهلكم اصدقائكم وحتستمتعوا والله😂👌🏼
ابحثوا عن الموضوع أكثر وبتلاقوا أفكار مررررة كثيرة✨
🔹 رأيي ونصيحتي💭 🔹
♦️ممكن تحكي بشكل عام عن جامعة الحرس ورأيك؟ وهل دراسة السنة التحضيرية مستحيلة وتعجيزية أم فقط صعبة؟ وايش نصيحتك للي يبغوا طب بشري؟
قبل كل حاجة اسألوا نفسكم.. لو فعلاً الموضوع كان تعجيزي، كيف الي قبلنا عدو وقدروا؟ "زي ماغيري قدر أنا كمان حأقدر بإذن الله". الموضوع كله والله توفيق من ربّنا ونصيب بس طبعاً لازم نعمل بالأسباب ونجتهد ونسعى.. خليكم واثقين بربّنا ومتيقنين ان ربي ماوضعكم في هذا المكان إلا وهو مقدّر لكم كل خير وادعوا دائماً " اللهم اكتب لي الخير حيث كان، ثم ارضني به"🙏🏼. الموضوع مهو مستحيل زي مو متخيلين.. حددوا هدفكم واكتبوه قدامكم، ودائمًا وأبدًا خلو عندكم خطة بديلة أو كما يقال عنها "خطة باء". وقبل كل شيء طبعاً لاتنسوا الاستخارة الاستخااارة🤲🏼.. اقرأوا عن كل التخصصات وخذوا فكرة عنها واتأكدوا من رغبتكم واتمسكوا بيها لأن دا الشيء الي حيخليكم تكمّلوا في الأيام الصعبة👌🏼. لاتسمعوا لكلام الناس أبداً ولا تتأثروا لكل أحد تجربة ممكن تكون سيئة وممكن تكون حلوة🤷🏻♀️ فلا تحكموا على الشيء من نظرة شخص واحد، اتمسكوا بحلمكم وخلوه قدام عينكم صدقوني الحركة دي حتقويكم في لحظات ضُعفكم، ايوا حتجي أيام صعبة وحتنكسروا وتضعفوا وهادي اللحظات هيا الي حتعلمكم كيف المفروض تذاكروا وايش تسووا وبكل أمانة حتكونوا في ضغط نفسي وضغط دراسي كبير وشغل مستمر من أول يوم لآخر يوم *ايش هوا الضغط الي بنمر فيه؟ السؤال اللي بعده👇🏼* لكن لما ترجعوا وتجلسوا عالمكتب وتطالعوا في الورقه الي كاتبين فيها هدفكم.. حتحسوا بطاقة ونشاط ويلا ننسى الي فات لأنه خلّص وراح ونركز على الجاي😍💪🏼. طبعاً مايحتاج أقول لازم كل شيء أول بأول وهذا مايعني أسبوع بأسبوعه لا! معناها يوم بيومه وخصوصاً سمستر٢ لأن فيه كل المواد العلمية. ليش أول بأول؟ عشان تكون عندكم فرصة اذا مافهمتوا شيء تروحوا تسألوا وتفهموا.. غلط جداااً تراكموا المحاضرات وتجو قبل الميد (اختبار نصفي) بكم يوم وتبدأوا تمسكوا المادة لأول مرة، مارح يمديكم تستوعبوا كل شيء وتدخلوا الاختبار وانتو متطمنين وواثقين من مذاكرتكم.
- نصيييحة اسألوا عن كل شيء مو فاهمينه حتى لو كان سخيييف جداً ولو ماكانت فيه فرصة بعد الكلاس تقدروا تروحو لمكاتب الدكاترة وقت الoffice hours، مارح يقصروا معاكم ومثل ماذكرت فوق تقدروا تروحوا لأي دكتورة حتى لو ماكانت تدرسكم.
- نصيحة تانيه احضررووا المحاضرااات كلهاا واكتبووا نوتس، خذوا ملاحظات ولا تعتمدوا على أحد أبداً حتى لو صاحبتك وواثقه فيها ممكن معلومة نسيتها ممكن شيء ما انتبهت له، الدكاترة وقت الكلاس بيقولوا نوتس وملاحظات مهمة جداً وتخليكم تستوعبوا المعلومة.. حتى لو مثلاً سمعتوا عن دكتورة انها سيئة أو ما تشرح أحياناً صح بالفعل ولكن لو ركزتوا ممكن يقولوا أشياء تساعدكم في الاختبار! وانتو المستفيدين في هذي الحالة🌟. ولو مثلا في دكاترة معينين يعجبوكم وتنبسطوا بشرحهم تقدروا تحضروا كلاساتهم بعد ما تستأذنوا منهم ولكن طبعاً احرصوا انكم ماتسحبوا على كلاساتكم الأصلية. اذا الدكتور/ة تسمح بالتسجيل فسجلوا المحاضرات.. أحياناً وقت الكلاس تفوتنا كم نقطة أو مانكون مركزين، تعبانين المهم لأي سبب كان، حيجي وقت وتحتاجوا انكم ترجعوا تسمعوا تاني👍🏼.
- ساعادووا غييركم، سويتوا ملخص حلو ومفيد؟ شاركوه في قروب الدفعة وخلوا الكل يستفيد، زي ماتساعدوا غيركم ربّنا حيرسلكم ناس تساعدكم في عز احتياجكم، ومو شرط مساعدة دراسة، ممكن الشخص يتذكركم ويدعيلكم وبسبب الدعاء ربنا يفتح عليكم✨.
- آخر شي ابدأوا يومكم بصفحة قرآن وحتشوفوا كيف البركة في يومكم😍✨.
لا تخافوا وتحطوا في راسكم فكرة الصعوبة من البداية.. وطول فترة الترمين ادعوا ربنا يعلق قلوبكم بالشيء الي فيه خير لكم واطلبوا التوفيق، وحطوا في بالكم دائماً الدفع الي قبلنا كلها عدت، انضغطوا فترة وتعبوا وعدوها. كلو حيعدي وحيسير ذكرى. كثير بنات كانوا متحطمين من معدلهم ولكن اتفاجأنا ان هذه السنه وعلى حظ دفعتي عدد مقاعد الطب زادت من ٥٠ إلى ٧٥ بالنسبة للبنات😍! اتعبوا وابذلوا كل جهدكم في الترمين واتذكروا (لا يكلّف الله نفساً إلا وُسعها) ربي ما اختار لكم هذا المكان إلا لأنكم تقدروا، التعب كلو حيروح والنتيجة هي اللي حتبقى🌟.
احنا علينا نتعب ونسعى، ونرضى بالنتيجة مهما كانت لأن الخيرة دائماً فيما اختاره الله👍🏼.
♦️بنسمع كلمة ضغط مرة كثير.. حكينا عنه؟
- من وجهة نظري-
🔘سمستر١: لو جيت بأختصره في كلمتين حأقول "ضغط نفسي مررة كبير.. ضغط دراسي خفيف". ممكن كثير يختلفوا معايا في هذي النقطة والسبب في اني قلت كذا هو اللغة واعتماد المعدل بشكل كبير عليها. كثير بنات كان السمستر الأول سهل ولطييف بالنسبه لهم لأن ماشاءلله لغتهم جداً كويسة، ومايفرق معاهم سواء الاختبار جا بنفس المستوى اللي بندرسه أو أعلى. ولكن اللي مستواهم متوسط إلى ضعيف حيعانوا شوية من الاختبارات وأوقات ممكن يحسوا بالظلم، ليش؟ لأن مواد الانقليزي بشكل عام ماتقدري تضمني درجاتها.. الاختبارات تقيس فهمك وإتقانك للقواعد يعني احنا نذاكر ونفهم كويس المنهج ولكن مانعرف ايش ممكن يجيبوا لنا قطع في الاختبار🤷🏻♀️.. نقطة ثانية كنت أحسه ممل شويه بحكم ان المواد فقط انقليزي وثقافة وعربي.
🔘سمستر٢: لو جيت بأختصره في كلمتين حأقول "ضغط دراسي مررة كبير.. ضغط نفسي أخف من الأول". ونفس الشيء ممكن كثير يختلفوا معايا في هذي النقطة والسبب في اني قلت كذا هو ان معدل سمستر٢ يعتمد اكثر على المواد العلمية.. وحقيقةً هو اللي يبين مين الي منجد يتحمل الضغط الدراسي، واللي يجتهد ويتعب يلقى نتيجة ترضيه ان شاءلله بعد توفيق ربنا.. وزي ماقلت كثير بنات تجربتهم كانت غير ويقولوا عكس كلامي.. فلذلك، خذوا فكرة عن تجارب الناس ولكن لا ترسموا طريقكم على أساسها👍🏼
🔘 بشكل عام في كل مكان وكل الجامعات السنة التحضيرية مُتعبة ولكن ليش بالذات في جامعتنا؟
- الضغط النفسي كبير لأن المنافسة مرة قوية وماشاءلله نخبة الطلاب والطالبات الي في الجامعة كلهم متميزين والرغبة بالطب البشري جداً عالية يمكن ٩٠٪ من اللي معاكم هدفهم ورغبتهم وحدة. والتفكير ياخذ من وقتنا وجهدنا كثير وغصباً عننا بنفكر في المستقبل وفي التنافس.. الكلام مو لغرض التحطيم ولكن عشان تكون عندكم فكرة عن اللي بيحصل.
- بعد شهر تقريباً من الدراسه حتبدأوا ميدتيرمز وهو الاختبار النصفي ولكن كأنه فاينل وعليه نسبة كبيرة غالباً تتراوح بين ٢٠-٢٥٪.. الميدتيرمز دائماً حتكون من الساعة ٢ الظهر إلى ٣ أو ٤ على حسب الاختبار، يعني تداومو دوام كامل ومحاضرات وكلاسات وبعدها بريك ساعة وبعد كذا تبدأوا الاختبار، بعكس الجامعات الأخرى أيام الميدتيرم يجو الجامعة يختبروا ويرجعوا بيوتهم زي نظام أيام الفاينل. والنقطة الأهم لما ماتبدأوا أول ميد خلاص ماحتوقفوا إلا لما تخلصوا فاينل، يعني كل أسبوع حيكون عندك ميد *في سمستر٢* وطبعاً الأسابيع هذي كلها يتخللها كويزات وأسايمنت.
- نقطة ثانية أحياناً نرجع البيت تقريباً ٥ العصر فالوقت مرة يكون متأخر ماتعرفوا هل تنامو وترتاحوا ولا تفهموا محاضرات اليوم ولا نبدأ نحضّر لبكرة ولا نستعد للميدتيرم الجاي؟
هذي نبذة عن بعض الضغوط اللي كنا نمر بيها.. ولكن عدّت🌟!
♦️هل ندمتي إنك دخلتي الحرس؟
هذا السؤال انطرح بتويتر من أحد طلاب جامعتنا.. وأغلب الاجابات كانت لا ماندمت! ✨
حأجاوب عن كل البنات.. كثير بنات ماندموا حتى أوقات الضغط، ليش؟ لأنهم استخاروا ربنا وواثقين ان ربي ماوضعهم في هذا المكان إلا وفيه الخير لهم سواء النتيجة كانت وفق رغباتهم أو لا، وبعضهم ندموا أوقات الضغوط بس ولكن لما خلصنا وعدينا ووصلوا للمكان اللي يبغوه رجع حماسهم وتعلقهم بالجامعة. والبعض الأخير ايوا ندم وفيه منهم من انسحب من الجامعة ومنهم من رضي وكمّل..
♦️ هل حأكون منعزلة عن كل الناس وما أخرج ولا مكان؟
سمستر١ لا مو مرة حيكون عندكم متسع من الوقت انكم تذاكروا وتنبسطوا وتاخذوا بريكات👍🏼
سمستر٢ حتكونوا شبه منعزلين وايوا حتضطروا انكم تتخلوا عن حضور بعض جمعات الأهل والأصدقاء وغيرها.. ولكن طبعاً إلا مايجي وقت وتحتاجوا تعطوا لنفسكم مكافآت وأوقات راحة عشان تكمّلوا🌟
♦️هل احتجتي مدرس/ة خصوصي؟ وهل مصادر المذاكرة واضحة؟
الأغلبيه ما احتاجوا لأن الدكاترة مابيقصروا معاكم لو سألتوهم، لكن فيه بنات احتاجوا، فالموضوع يعتمد على الشخص.
مواد الانقليزي والثقافه والعربي جميعها واضحة ولها مرجع وهي الكتب📚، العربي سمستر١ كان علينا اننا ندور ونبحث بنفسنا لبعض الجزئيات وتوجد ملخصات ممكن تفيدكم *قسم المواد👇🏼*.
المواد العلمية مرجعها الأساسي السلايدات ينزلوها الدكاترة على برنامج اسمه Blackboard، ممكن تواجهوا بعض النقاط الي ماتكون مشروحة تمام وهنا عندكم حلين يا انكم ترجعوا للدكاترة يشرحولكم أو ترجعوا للكتب وتقرأوا الجزئية الخاصة بالموضوع *روابط تحميل الكتب في قسم المواد👇🏼*.
🔴نصييييحة: سمستر٢ أشتروا ايباد والقلم حقه بترتاحوا كثيييييرر من حوسة الطباعة. برنامج Notability رهييب رهيب لعرض السلايدات والكتابة عليها والتسجيل 🔴
♦️لما أشوف حلطمة في تويتر أخاف وأشيل هم.. كلام الناس يحطمني.
لما الانسان يكون مضغوط، يحتاج انه ينفّس عن نفسه ويطلع الي جوته عشان يقدر يكمّل.. طرق التنفيس كتير ومنها الحلطمة. الكلام الي بتشوفوه في تويتر ولا بتسمعوه من الناس في فترة الضغط دا كلو طريقه للتنفيس فقط، وايوا حيجي يوم انتو كمان تتشكّوا وتتحلطموا طبيعي جداً😂👍🏼 ولكن لا تخلو الشيء دا يسيطر عليكم ولا يأثر عليكم بشكل سلبي وسبق وذكرت لكم انها فترة حتنضغطوا فيها وحتتحلطموا وحتتعبوا بس حتعدّي ان شاءلله
♦️كيف تجربتك مع الدكاترة؟
أغلب الدكاترة ماشاءلله مرة كويسين وفاهمين وحيساعدوكم كتير🌟. خذوا فكرة عن كل دكتور ودكتورة ولكن لا تعتمدوا، مو عشان سمعت ان الدكتورة هذي ماتشرح كويس خلاص ما أحضرلها، غلط! يمكن الشخص الي نصحك ما اتفق مع طريقة الشرح وممكن انتو تناسبكم! وحتى لو مثلا الدكتورة فعلاً ماعجبتكم ولا ناسبتكم طريقة شرحها ممكن لو ركزتوا معاها تقول معلومات تساعدكم بالاختبار.. ولكن اذا منجد مو مستفيدين ولا ١٪ فالقرار قراركم في الحضور.
♦️ليش كثير طلاب وطالبات سحبوا من الجامعة؟
من ضمن الأسباب: بعضهم ماوصلوا للي يطمحوا له ولشدة تمسكهم به ققروا انهم يحولوا جامعة أخرى، والبعض ماعجبهم نظام الجامعة والضغط الدراسي الي فيها، والبعض الاخر ماوجد نفسه في المجال الطبي وقرر انه يحول لتخصصات في جامعات أخرى.
♦️ليش كثير يشتكوا من الاختبارات؟ وهل الاسئلة من المنهج؟
مواد الانقليزي *أحياناً* تكون الاختبارات أعلى من المستوى اللي بندرسه وأحيانا نفس الخيارات تكون متشابهة أو ماتدري ايش الصح من بينها. ولكن لاحظت لو مثلا الميد الثاني كان صعب ف الفاينل يسهلوه وهكذا.
المواد العلمية أكثر سبب متعبنا ان فترة الاختبارات قريبة من بعض وضيق الوقت، وكل اختبار لازم يكون فيه كم سؤال يبين مين الفاهم ومين لا 👍🏼. الاسئلة من المنهج ولكن بعضها ممكن تجي بلفة وبطريقة غير مباشرة وتختبر ذكائك والقدرة على الاستنتاج.
♦️ايش أصعب فترة مريتي بيها؟
- بداية سمستر٢.. بداية مختلفة تماماً لأنه من أول يوم حتبدأوا محاضرات للمواد العلمية وأسلوب جديد وخاصة ان السلايدات كلها انقليزي ومصطلحات علمية ولكن شرح الدكاترة أغلبه عربي.. كانت صعبة شويه ولكن كم أسبوع وتتعودوا عالوضع ان شاءلله.
- فترة الفاينلز في سمستر٢.. الوقت ضيق وكمية المذاكرة تعتبر كثيرة
♦️هل كنتوا تناموا وقت كافي💤؟
للأمانة لا .. بس نصيحة حددوا لكم وقت تناموا فيه سواء خلصتوا الجزئية اللي محددينها لليوم أو لا..مهم تناموا كويس وخصووووصاً قبل يوم الميد لأنه حيكون بعد دوام ويحتاج تركيز.
_________________________________________________________________
المواد لسمستر١ و٢ (نبذة عن محتواها ونصائح عامة وروابط مفيدة) 📚
♦️هل حأدرس مواد طبية في التحضيري؟ لا. ✨السنة الأولى كل الكليات يدرسوا نفس المواد.
1️⃣ سمستر١:
هنا رابط دروب بوكس ستجدوا كل مايخص السمستر الأول أعدّوه الدفعات اللي قبلنا وتدريبات الانقلش الي فيه رهييبة وتفيدكم كثير🌟، اتدربوا عليها قبل الكويزات والميدتيرمز ولكن لا تشتتوا نفسكم كتير اللي تحسّوه مو مذكور في الكتاب لا تعقدوا نفسكم بيه، احفظوه عندكم. + موجود ملخصات تخص الثقافة والعربي.
وهذا رابط الدرايف لدفعتي (باتش ٤/٨) ١٤٣٨-١٤٣٩هـ / ٢٠١٧-٢٠١٨م.
في semester 1 ، قسم العربي والثقافة حتلاقوا ملفات تفيدكم جداً وملخصات 👇🏼🌟
هنا درايف باتش ٦/١٠ :
✨قبل الدراسة بكم يوم اتصفحوا الروابط عشان تكون عندكم فكرة عن محتواها✨
✨كتب الانقليزي اشتروها من مكتبة دار حافظ حتلاقوها بنصف السعر الموجود في جرير، أو ممكن تاخذوها مستعملة من الدفع الي قبلكم وهذا حيكون عن طريق برنامج يقدمه النادي الطلابي/أرشدني، وسيتم الإعلان عن التفاصيل في بداية السنة على حساب تويتر @ ArshidnyClub_J ✨
🔴 كل مواد الانقلش فيه جزء من الدرجات مقسم على المشاركة والحضور والغياب. + كل الميدتيرمز والفاينلز اسئلتها اختياري وتظليل في الورقة، وفيه جزء مقالي (subjective) 🔴
📙مادة الكتابة Writing ✍🏼 :
حتحتاجوا الكتابين الي في الصورة :
هي أكثر مادة حتختبروا فيها لأنها تتضمن اكثر من شيء،
- أولا: الكويزات *اختبار صغيير* وغالباً يكون عبارة عن قطعة وتجاوبوا عالاسئلة اللي بعدها وممكن فراغات وغيرها *اطلعوا على نماذج من رابط الدروب بوكس والدرايف*. تقريباً ٤ كويزات في السمستر والنسب عليها قليييلة جدا تقريبا ٢٪.
- ثانياً: الأسايمنت وهو عبارة عن برقراف تكتبوه على عدة كلاسات وتتقيموا عليه، كل ما اخذتوا نوع برقراف جديد حتكتبوا عنه والسمستر الأول ٤ أسايمنت وتختلف عليها النسب لكن تترواح بين ٤٪-٦٪. في البدااية بعد ما تتعلموا الأساسيات ممكن يعملوا لكم تدريب للطريقة وحتكتبوا برقراف تجريبي ماعليه درجات ولاشيء👍🏼
- ثالثاً: ميدتيرم ١و٢ نفس طريقة الكويز بس أطول، والفاينل عبارة عن اختبارين واحد كتابة برقراف كامل في ٣ ساعات في يوم لوحده، والثاني اختبار للقواعد والاشياء اللي حتدسوها في الكتاب مثل طريقة الكويزات.
🔘المادة بشكل عام ممتعة وحتلاحظوا تطوركم بشكل كبير في نهاية السنة ولكنها مُتعبة.. وأوقات ممكن تحسوا بالظلم لأن تصحيح الأسايمنت كله يعتمد عالمس، وبعض المسز يراعوا وبعضهم لا🤷🏻♀️ ولكن أكيد عندكم فرصة للمناقشة وممكن انكم تطلبوا إعادة تصحيح ويكون من مس مختلفة ولكن حترضوا بالدرجة الثانية حتى لو كانت أقل.
✨نصيحة: طبعاً انتو حتكتبوا بس عن موضوع واحد تتقيموا عليه من بين المواضيع الي عندكم ولكن لمصلحتكم وعشان تفيدوا نفسكم أكتبوا عن المواضيع الباقيه وروحوا للمس تعطيكم فيدباك. اعرفوا أغلاطكم وأفهموا طريقة تفكير المس وايش أكثر شيء يهمها وتركز عليه وان شاءلله حتمشوا تمام🙏🏼
📗مادة الاستماع Listening 👂🏼:
من اسم المادة واضح محتواها👌🏼هدفها تعلمكم كيف تتكلموا وتفهموا اللي بتسمعوه، وحيكون فيها فوكاب تتعلموها وتعرفوا معناها. درجاتكم حتكون مقسمة على عدة أشياء:
- أولاً: الكويزات وعبارة عن مقطع تسمعوه مرتين وتجاوبوا عن الاسئلة + يختبروكم بالكلمات الي في الكتاب (جمل فيها فراغ وانتو تختاروا الكلمة المناسبة)
- ثانياً: البرزنتيشن ١ و٢، الأول جماعي والثاني فردي.
- وثالثاً: ميدتيرم ١و٢ ونفس نظام الكويز ، والفاينل عبارة عن اختبارين واحد interview في يوم لوحده (تدخلوا غرفة وتسحبوا بطاقة وتتكلموا عن المكتوب لمدة دقيقتين تقريباً أو أقل) والاختبار الثاني نفس نظام الكويز.
🔴 مادتي ال writing + listening درجاتهم تحسب كمادة وحدة والميدتيرم والفاينل حيكونوا بنفس اليوم ونفس الاختبار، عليهم ٥ ساعات⏱ 🔴
🔘المادة ممتعة والكلاس كأنه بريك بس تجلسوا تهرجوا وتتكلموا وهكذا.. مافي شي صعب غير ان المقاطع السمعية *أحياناً* تكون مستواها عالي يعني يتكلموا بسرعه أو مثلا مانفهم ايش قالوا وممكن تجي اسئله غير مباشرة يعني انتو تستنتجوها من القطعة، مثال: ايش شعور الشخص؟ هل كان فرحان أو حزين أو متحطم؟، وأوقات تجينا سهلة الحمدلله👍🏼
📕مادة القواعد Grammar ✖️✔️:
عدد الساعات ⏱: ٤ ساعات
كتابين: واحد فيه القواعد وهذا موجود في رابط الدرايف مع حلوله اذا مو حابين تشتروه، والثاني عبارة عن تدريبات وأنشطة والحلول موجودة في نهاية الكتاب.
*حتلاقوا الكتاب في سمستر٢ مادة القرامر١١٢ لأنه نفس الكتاب حيستمر معاكم طول السنة*
🔘 المادة غنيّة عن التعريف ونفس الشيء كويزات ٤ أو ٥ + ميدتيرم ١و٢ + فاينل.
أغلب القواعد نعرفها وسبق دراستها في منهج الثانوي، والمنهج عبارة عن الأزمنة simple, perfect, progressive ، تعتمد كثيير على الفهم ولازم تتدربوا كثير عشان تتقنوها.. جزئيات المقالي (subjective part) في الميدتيرم صراحة ماكانت سهله وهيا اكتر شيء كنا نعاني منه في القرامر لكن مقدور عليها ان شاءلله.
📘مادة القراءة Reading 📖 :
عدد الساعات⏱: ٥ ساعات.
أكثر شيء يركزوا عليه كيف تستنتجوا الفكرة الرئيسية والTopic والخاتمة وهذي الأشياء وتعتمد بشكل كبيييييرر
جداً على فهمكم للقطعة.
نفس الشي لها كويزات والنسب عليها قليلة جداً ولكن لا تستهونوا فيها حتكونوا محتاجين لكل بوينت ولكل ربع ونص درجة في السنة الأولى، وميدتيرم١ و٢ وفاينل. المذاكرة ماتعتمد أبدا على الكتاب بس كنا نستخدمه وقت الكلاس.. حينزلوا لكم فوكاب ليست على البلاك بورد وهي اللي تذاكروها. الاختبارات كلها نفس النظام ولكن الميدتيرم اسئلة اكثر وقطع أطول، وهي عبارة عن: جمل وتختاروا الكلمة المناسبة، المرادفات توصلوها لبعض، part of speech يعني يجيبوا لكم فراغ وانتو تختاروا التصنيف المناسب للكلمة هل فعل، اسم، صفة، أو حال.. واخر شيء قطعة وعليها اسئلة وايضاً فيه جزء مقالي لل spelling.
هذه قناة تيليقرام عملتها تهاني الله يعطيها العافية حتفيدكم كثير💕👇🏼:
🔘حصيلة الكلمات اللي حتخرجوا بيها كبيرة جداً ما اعرف كم بالضبط ولكن فوق ال ٨٠٠ كلمة وحتنمي لغتكم مره كثيييير. لا تراكموها تحتاج منكم مذاكرة، وتدريب كثير للقراءة والفهم. القطع الي في الاختبارات مالها مستوى معين ولا اقدر اقول سهله ولا صعبة.. بعضها تكون سهلة ولكن نفس الاسئلة مُحيّرة، وبعضها صعبة ولكن الاسئلة تقدري تستنتجي جوابها🤷🏻♀️
هذي صورة لل vocab list وغالباً تتراوح بين ال٨-٤ صفحات للشابتر الواحد👇🏼:
🔘برنامج مفيييد جدا جداً وحتى التيتشرز نفسهم يمدحوا بيه Quizlet. رهيييب رهيب وأغلب البنات يذاكروا ويراجعوا منه تحملوه على الجوال, زميلتنا من الدفعة إيلاف العماري جزاها الله خير عملت كل الكلمات مع تعرفيها والسننمز💜، ممكن الكلمات تتغير مستقبلاً ولكن اذا حابين تتطلعوا على البرنامج وكيف طريقته فهذا رابط لكل كلمات سمستر١ 👇🏼:
📒مادة العربي:
عدد الساعات ⏱: ساعتين.
مصدر المذاكرة عبارة عن ملزمة تنزل على البلاك بورد وتطبعوها. المنهج: جزء البداية كله حفظ ولكن لما تبدأوا تدخلوا على الإعراب احرصوا انكم تكونوا فاهمين القواعد كويس.. وللأسف ان الملزمه مختصصررررة جداً وغير واضحة *تقدروا تطلعوا عليها من رابط الدرايف، سمستر١ قسم العربي*. + فيه ملخصات ممكن تساعدكم كثير، من ضمنها👇🏼، فيه بنات ماذاكروا إلا منه وقت الفاينل😍💪🏼 ولكن هذا مايعني انكم تعتمدوا عليه فقط.
*عذراًعلى الخط😂 ان شاءلله مستقبلاً ممكن أرفق تحديث للفايل ويكون مرتب اكثر بالوورد*
🔘المادة سهلة ومثل ماذكرت البداية كلها حفظ، وجزء الاعراب كله سبق ودرسناه في الثانوي ولكن يحتاج انكم ترجعوا لمصادر أخرى. الاختبارات عبارة عن ميد١ وفاينل أيضاً سهلة الحمدلله ومافي شيء يخرج من المنهج وكله اختياري وتظليل وكل غلط ب ٠.٧٥ درجة إلا ربع🌟
📓مادة الثقافة الإسلامية:
عدد الساعات⏱: ساعتين.
مصدر المذاكرة عبارة عن كتاب تشتروه من مكتبة جرير وتوجد نسخة للكتاب في رابط الدروب بوكس تقدروا تحملوها على الآيباد، وتقدروا تطّلعوا على الملخصات بعد ماتخلصوا مذاكرة.
🔘 المادة صراحةً مُتعبة وتعتمد على الحفظ الحفظ الحفظظ بشكل كبيييير. معلومات الكتاب كثيرة جداً وتوجد اسماء علماء وتورايخ وأسباب وآثار وغيرها... لا تراكموها وحاولوا كل أسبوع تخصصوا جزء من وقتكم لها واحفظوووا مرة كويس👍🏼. الاختبارات مو صعبة ولكن إلا مايكون فيه كم سؤال يبين مين اللي مذاكر كويس ومين لا.. أو بالأصح من الي حافظ الكتاب ومين لا!. والاختبارات عبارة عن ميد١ وفاينل كل غلط بنسبة والاسئلة اختياري.
🔴مادة العربي والثقافة جزء من الدرجات مقسم على المشروع تقريبًا ١٠٪ أول اقل، يختلف على حسب الدكتور/ة ايش يطلبوا منكم🔴
2️⃣ سمستر٢ :
هذا رابط الدرايف لدفعتي ١٤٣٨-١٤٣٩هـ / ٢٠١٧-٢٠١٨م.
في قسم semester 2 حتلاقوا كل مايخص المواد من نماذج وسلايدات مترجمة وتلخيصات وغيرها كثير كثيير أشياء حتفيدكم😍
ولا تنسوا من دعائكم من ساهم في عمل الرابط: إيلاف العماري، بشار الشيخ، عبدالعزيز هاشم، مودة الصائغ🌟
🔴نصييييحة: سمستر٢ أشتروا ايباد والقلم حقه بترتاحوا كثيييييرر من الطباعة وحوسة الأوراق. برنامج Notability رهييب رهيب لعرض السلايدات والكتابة عليها والتسجيل 🔴
📚مواد الانقليزي: نفس نظام سمستر١ في كل شيء ، لكن مادة ال Listening بتنحذف، وكل مادة عليها ساعتين⏱. الكتب كلها نفسها ماحتشتروا شيء جديد إلا كتاب الريدنق نفسه ولكن عليه رقم٢ وللأمانة ماحتستفيدوا منه أبدا والكتاب موجود في رابط الدرايف سمستر٢ تقدروا تحملوه عالايباد.
🔴اختبارات الانقليزي كلها الغلط مايكون بنسبة كاملة من ١٠٠. كيف يعني؟ لو مثلا هذا الاختبار من ١٠٠ سؤال وعليه ٢٥٪، فكل ٤ أغلاط بنسبة وحدة. لو طالب مثلا غلط في ٨ اسئله حيكون جاب ٢٣٪ 🔴
📙 الرايتنق : حتاخذوا أنواع برقرافات جديدة وحتكتبوا ٣ أسايمنت واخر شيء واحد essay ، نفس نظام الاختبارات (كويزات، أسايمنت) ولكن حتتعلموا شيئين جديدة وهي ال summarizing + paraphrasing / Editing task ، ومافي إلا ميد١، والفاينل قسمين مثل ماذكرت فوق ولكن في سمستر٢ حتكتبوا باراقرافين لنوعين مختلفة في ٣ ساعات.
📘 الريدنق: مافي شيء تغير غير الكتاب ولكن حتتعلموا كلمات جديدة أكثر.
🔘 هذا كويزلت لمادة الريدنق ١١٣ حق جزء السابجكتف بارت شابتر ٦-٧
SUBJECTIVE PART 113(female section)
https://quizlet.com/Elaf_alamari/folders/subjective-part-113/sets
وهذا كويزلت لجزء الMCQ وحيكون بس synonym زي السمستر اللي فات
وهذا كويزلت لجزء الMCQ وحيكون بس synonym زي السمستر اللي فات
MCQ 113(female section)
ملاحظة: اضغطوا على اسم إيلاف في كويزلت وبتلاقوا تقسيمات أكثر+ والكلمات اللي مالها تعريف تلاقوها في السننم.
📕القرامر: نفس نظام سمستر١ في كل شيء، ولكن حتلاحظوا ان بعض القواعد تحتاج حفظ كلمات كثير.
📒مادة العربي: عليها ساعتين⏱، يعتبر أسهل من سمستر١ وتقريباً كل الملزمة حفظ وفيه جزئيات بس قراءة بفهم، جزء مرررة قليل اللي خاص بالقواعد مثل الالف المتوسطة والمتطرفة وغيرها ومشروح وواضح تمام👌🏼. الملزمة موجودة في رابط الدرايف.
📘مادة الأحياء Biology 🔬:
عدد الساعات⏱: ساعتين.
رابط تحميل الكتاب، هذا الإصدار الأجدد ومافي اختلاف كثير عن القديم:
🔘 قبل مايبدأ سمستر٢ قرأت تجارب الي قبلي والاغلب كان يقول ان الاحياء ادسم مادة وتحتاج حفظ كثير و و و.. لكن لما جربت بنفسي بالعكس! اكثر مادة حبيتها هي الاحياء. حتبدأوا بالبروتينات والدهون والكربوهيدرات تركيبها ومعلومات عنها، والجزئيات الأخيرة كلها عن الDNA. المادة دسمة وطويلة وأول لكتشر تاخذوها ممكن تخرجوا وتحسوا نفسكم منهارين وضايعين وكيف نذاكر و و و... وخصوصاً ان اغلبها مصطلحات علمية جديدة، لكن ممتعة مررره مره، يبغالها حفظ مع فهم كثير بنات اعتمدوا عالحفظ بس ودا الشيء غلط، اذا تبغو تضمنوا انكم تحلوا كويس ان شاءلله ف لازم تكونوا فاهمين كل حاجة خصوصاً في الشابترز الاخيرة والصور الي في السلايد غالبا ماتكون عليها نوتس ولاشيء ف ارجعوا للكتاب وخذوا بس النوتس الي على الصور لأنها مفيده مرة وتشرح ايش بيصير، الكتاب مره متشعب وداخل في التفاصيل والمعلومات اللي فيه بحر لاتشتتوا نفسكم اكتفوا بالسلايدات والنوتس الي على الصور خذوها من الكتاب حتفيدكم كثير. الشابترز الاولى تقريبا اغلبه حفظ.
كل اسبوع حتاخذوا لكتشر وحده ف حاولوا مايجي الاسبوع الي بعده الا وانتو مخلصين مذاكرة حقت الاسبوع الي قبل، دا الشيء حتقدروا عليه في البدايه بس لما تبدأوا ميد٢ ممكن تحسوا بضغط وتبدأ تتراكم شوية..
اذا الدكتورة تسمح تسجيل المحاضرة ف انصح مليون مره بالتسجيل بالذات في الاحياء، لانه معلومات كثيره واحيانا بيقولو شرح وامثلة تساعدكم في الفهم وخصوصا في الصور احيانا يكون pathway لعملية ومو مكتوب شيء على السلايدة، ف كلام الدكتورة وشرحها مره يساعد. اذا فاتتكم جزئية ارجعوا اسمعوها ثاني واكتبوا الملاحظات المهمة، ولكن اذا اللكتشر واضحة مثلاً فلا تضيعوا وقتكم.
حاولوا تذاكروا جزئية الميد مرة مرة كويس لأن وقت الفاينل يمكن مايكون عندكم الوقت الكافي انكم ترجعوا وتذاكروها كويس يعني خلو في بالكم لازم تمروا عليها سريع سريع👍🏼 ودا الشيء ينطبق على كل المواد الباقية.
حتسعوا كلام كثير ان الدكتورة هذي كوسة وهذي مو كويسة ولكن اسمعوا من اذن وخرجوا من الثانية، حقيقي كل شخص له تجربة وممكن الدكتورة ماتناسب غيركم بس تناسبكم انتو.. خذوا فكرة ولكن لا تعتمدوا
الاسئلة ماتخرج من السلايدات كثير ممكن تجي بلفة او يكون يبغالها تفكيييير وفهم مرة مرة، الميد كان تقريباً حلو وكثيير بنات جابو درجات مرة حلوة🌟، ولكن للأمانة الفاينل ماكان سهل.. الاسئلة اغلبها كانت بلفة وبعضها جاتنا كـ case ولكن اللي مذاكرة وفاهمة كويس حتحل ان شاءلله، وممكن كم سؤال يعتمد عالاستنتاج.
🔘 مادة الأحياء فيها لاب "معمل" وحيكون عبارة عن سلايدات برضو وتذاكروا منها👍🏼 وفيه حاجه اسمها lab report عليه ١٠٪، كل لاب تاخذوه حيكون له لاب ريبورت زي ورقة العمل تحلوها وموجود حلول كثيرة في رابط الدرايف.
📕مادة الكيمياء Chemistry 👨🏻🔬👩🏻🔬:
عدد الساعات⏱: ٤ ساعات.
رابط تحميل الكتاب:
🔘المادة قسمين general and organic
الي درّسوا دفعتي دكاترة رجال د.إسماعيل و د.عماد وكلهم رهيبين جداً.
1️⃣ حنبدأ بالجينرال وهوا عباره عن ٨ شابترز كلها قد سبق دراستها في الثانوي، مذاكرة اول باول اخذتوا لكتشر ترجعوا البيت تحاولوا تبدأوا تفهموها عشان يكون عندكم وقت تتواصلوا مع الدكاترة سواء عن طريق الايميل او ال office hours واحيان بعد مانخلص المحاضرة يكون باقي وقت شويه ف نروح نسأله. مهم مهم مايتراكم لانه لو جا وقت الميد حتكون الكميه كبيره وماحيمدي انكم تفهموا كل شيء وقتها
وطبعا في معلومات لازم تنحفظ بالذات في الشابترز حقت الجينرال وهو يعتبر اسهل من الاورقانك بالنسبة لاغلبية البنات. لكن في نظري كنت اشوف الاورقانك أحلى وأمتع🤷🏻♀️
2️⃣ القسم الثاني الي هو الاورقانك اذا تفتكروا الالكين والالكاين والكحول والايثر و و و... نفس حق الثانوي اعاادة بس اللهم بالانقلش بس فيه شي جديد اول مره ندرسه وهوا اكثر شابتر اغلبنا ماحبيناه (Stereoisomerism) لانو شويه جديد علينا وفيه افكار غريبه.. في البداية كان صعب علينا بس لما فهمناه عادي سهل لكن يبغاله وقت واستيعاب👍🏼
الاورقانك يبغاله أولل بأووول اكثر من الجنرال كمان لانو كله يعتمد على بعضه كل لكتشر تاخذوها تتبع الي قبلها وهكذا، سجلوا المحاضرات اذا الدكاترة يسمحوا ولا تعتمدوا عالتسجيل ركزوا في المحاضرة لأن احيان مارح يكو عندكم وقت تسمعوا.
🔘 أحلى شيء في الكيمياء ان نظامه بلوكات، ايش يعني؟ الجزئيات اللي تختبروها في الميد ماتدخل معاكم في الفاينل، باستثناء الاورقانيك كله حيدخل حتى اللي اختبرتوه في الميد لأنه يعتمد على بعضه.
بالنسبة للاختبارات شدوا حيلكم في ميد١ و٢ لأنهم يعتبروا سهلين ان شاءلله ف حافظوا على درجاتكم، الفاينل صراحةً ماكان سهل وكثير اشتكوا منه وحتى الدفع الي قبلنا قالوا لنا نفس الكلام.. مهو شيء تعجيزي ولكن لأن الأورقانيك واسع جدا فممكن تواجهوا بعض الافكار ماقد مرت عليكم في التدريبات.
🔘مادة الكيمياء فيها لاب "معمل" وحيكون عبارة عن سلايدات برضو وتذاكروا منها👍🏼 ونفس الأحياء كل لاب له لاب ريبورت زي ورقة العمل تحلوها.
📙مادة الفيزياء physics 🌎 :
عدد الساعات⏱: ٤ ساعات.
رابط تحميل الكتاب، كل شابتر لوحده منفصل:
🔘أغلب المواضيع اعادة للثانوي ماعدا كم شابتر من الاخير وحتلاحظوا ان كل شابتر له موضوع مختلف يعني تقريباً حتدرسوا كل شي اخذتوه بالثانوي بشكل عام مو مفصل وحتبدأوا بأشياء بسيييطة جدا مثل قوانين نيوتن والسرعه والتسارع، ومن ضمن المواضيع أيضاً الموجات الصوتية والضوئية، الضغط الزخم الكثافة.. الفيزياء اغلبه فهم فهمممم ماعدا طبعا القوانين وبعض المعلومات الي لازم تنحفظ، نادراً يجيكم في الاختبار سؤال نصاااً من السلايدات إلا بعض المعلومات زي التعاريف مثلاً فلا تضيعوا وقتكم وتحفظوا كل شيء. الاسئلة اغلبها تختبر فهمك لكن فيه بعض الشابترز حتلاحظوا انه اغلبها حفظ ومفاهيم.
🔴القوانين والثوابت كلها تجي بالاختبار مكتوبة في اخر صفحة، ولكن هذا مايعني انكم ماتحفظوا القوانين.. وقت الاختبار حتكونوا محتاجين لكل دقيقة وايجاد القانون من بين القوانين المكتوبة كلها حيضيع عليكم وقت، احفظوها واذا مثلاً شكّيتوا تقدروا ترجعوا لاخر صفحة تتأكدوا🔴
للأمانة الفيزياء اكثر مادة كنا نشيل همّها مو لصعوبتها ولكن غالباً السلايدات تعطيكم جملة ويلا انتو افهموا بنفسكم ف الكتاب كان مره يساعد وكتييير بنات استفادوا منه ويمدحوه. وممكن ترجعوا له بس في النقاط الي مو فاهمينها لأن أحياناً ممكن مايكفيكم الوقت تقرأوا كل شيء 👍🏼 لا تشتتوا نفسكم مرة كثير لأن احيانا الكتاب يذكر أشياء مو موجودة في السلايدات، ف اقرأوا عن الجزئيات المذكورة وافهموها كويس وبس.
بعد كل شابتر حتحلوا اسئلة ال problems وموجودة كلها مع الحلول في رابط الدرايف. وتقريباً اسئلة الاختبار الي تكون مسائل ماتخرج عن أفكار البروبلمز. وفيه حاجة مفيدة كمان في نهاية الكتاب اسمها review cards تلخيص للشابتر والنقاط اللي فيه، موجود فايل في رابط الدرايف يجمعها كلها.
🔘المادة مافيها لاب. بالنسبة للاختبارات حتلاحظوا ان ميد١ اغلبه مسائل وقوانين بعكس ميد٢ اللي اغلبه كان كلام. ومثل ما ذكرت فوق حتسمعوا كلام كثيير عن الدكاترة هذي تشرح وهذي ماتشرح وممكن في نص الترم يبدلوا بين الدكاترة.
_____________________________________________________________________
تم بحمد الله🌟..
إن أصبت فمن الله وإن اخطأت فمن نفسي والشيطان، ان شاءلله اكون نقلت لكم التجربة على أكمل وجه وبكل واقعية.. وقبل كل شيء الموضوع كله توفيق من ربّنا ونصيب، اذا ربي كاتب لكم الشيء حتاخذوه وحتوصلوا بإذن الله🌟. .. واعتذر عن طول الملف ولكن حرصت أن يكون شامل لكل تساؤلاتكم.. واسأل الله لي ولكم التوفيق ولا تنسوني من صالح دعائكم❤️
أختكم/ مودة هشام الصائغ، اي استفسار أو تعليق هذا حسابي في تويتر والخاص مفتوح لكم جميعاً @mawalsaegh✨
No comments:
Post a Comment