Mawaddah Alsaegh: 2nd year

بسم الله الرحمن الرحيم

◾️ Semester 4 :

السلام عليكم ورحمة الله وبركاته. حأتكلم هنا عن مواد السمستر الرابع للسنة الثانية بجامعة الملك سعود بن عبدالعزيز للعلوم الصحيّة- جدة، مسار موحد.

🖇 بدايةً، أغلب المصادر المذكورة تجدوها في رابط الدرايف الخاص بدفعتنا batch4&8 للعام الدراسي ١٤٣٩-١٤٤٠هـ /

2018–2019

🌟 تم تحديث المدونة بناءً على التغييرات الحاصلة لِـ Batch 5 & 9 للعام الدراسي ١٤٤١ هـ / 2019-2020 م ، جميع الإضافات والتعديلات ستُكتب بهذا اللون

كل الشكر لِـ غدي الحربي، ضي الراشد، عبدالعزيز الراشد.

بدايةً الممتع في هذا السمستر إنكم حتبدأوا تدرسوا المواد الطبية الأساسية لكن الجانب السلبي من هذا الموضوع هو إنه تقريباً حتاخذوا كل شيء خلال كم شهر فقط. بشكل عام وقت الميدات كان الوضع تمام وفي وقت اننا نذاكر ونلم المنهج (كان عندنا ميد واحد كل أسبوع باستثناء أسبوع واحد أختبرنا فيه ميدين) لكن أنا شخصياً وأتوقع الأغلبية وقت الفاينل كان ضغط جداً وتعب وإرهاق. سمستر٣ كتبت لكم انه عندكم فرصة كبيرة ترفعوا معدلاتكم وتجيبوا درجات لو شديتوا على نفسكم وبتوفيق ربنا طبعاً، هنا في سمستر٤ ممكن الوضع يتطلب جهد أكبر بحكم دسامة المواد لكن أكيد مافي شيء مستحيل وان شاءلله ربي يوفقكم.

🔴 أول يوم مادرسنا ولاشيء وكان تعريفي فقط. جات كل مس وقت كلاسها وقالت حأدرسكم كذَا وكذَا ودي المراجع والكتب ونظام الاختبارات ووو...

عندكم ٦ مواد (اختبارات) لكن فعلياً هي أكثر، الأبلايد نفس مواد الطب باستثناء ال Histology& Embryology حيكون عندهم بدالها مادة تخصص.

بالنسبة للتمريض مختلف تمامًا وهنا ثريد من أسيل الله يعطيها العافية موضحة فيه المواد:

https://twitter.com/sola_sh/status/1081624067491487744?s=21

______________

1️⃣ Anatomy and physiology:

حتختبروها كمادة وحدة في اختبار واحد لكن فعلياً هي مادتين وكل وحدة لها محاضراتها لكن مرتبطة ببعض. فمثلاً في البداية حتبدأوا أناتومي تقريباً ٤ محاضرات الين تخلصوا سستم معين وبعدها تاخذوا الفسيولوجي حقه وبعدها ترجعوا تبدأوا أناتومي سستم جديد والفيسيو حقه وهكذا بالتناوب.

🔵Anatomy:

هي مادة التشريح وحتاخذوا فيها أجهزة الجسم كلها. واجهنا صعوبة في البداية عشان نتعود على طريقة مذاكرتها وطبيعي مرة اننا نقعد بالساااعات على لكتشر وحده ونجي نمسكها تاني كأننا نذاكر من أول وجديد، المادة يبغالها تكراار خصوصاً في البداية. كنت دايماً اسمعهم يقولوا الأناتومي فهم مو بس حفظ وفعلاً ما استوعبت دا الشيء الا على النص.. حيسهل عليهم كتير لما تستوعبوا الكلام وكيف فعلياً هوا بيكون في الجسم وتقريباً دا كان الجزء الصعب بالنسبالي لأن السلايدات ماتساعد كتير ونتعب عبال نفهم هما ايش قصدهم.. كثير بنات كانوا يشوفوا فيديوهات يوتيوب لكن انا شخصياً كنت استخدم برنامج Compelete Anatomy هو بفلوس بس يستحق صراحة، ما كنت استخدمه في كل شي لكن يساعدني كثير. موقع اسمه ken hub ما استخدمته شخصيًا لكن سمعت عليه مدح كثير.

مايحتاج كتاب لأن اللكتشرز أصلًا كثيرة فركزوا عليها أفضل. سوينا لجنة لنوتس الأناتومي والفيسيولوجي تلقوها في الدرايف لكل مادة.

💡من المصادر المُفيدة جددددًا خلال هذا البلوك هو Atlas of Human Anatomy - NETTER

جدًا مفيدة خصوصًا في لاب الأناتومي، وأيضًا خلال دراسة المحاضرات. وتوجد أيضًا Flashcards لنفس الكتاب.

المادة لها لاب، وأكببرر غلطة في الأناتومي هي مراكمة اللابات وعدم مذاكرتها أول بأول لأنه حيسبب أزمة وقت الفاينل.

🔴 طريقة المذاكرة الي أحسها مناسبة من رأيي وكان المفروووض إني أمشي عليها طول السمستر قد ما أقدر (هوا صراحة صعب الواحد يلتزم طول السمستر نظراً لدسامة باقي المواد وخصوصاً وقت الاختبارات لكن الواحد يحاول)

١- أول ما تاخدوا لكتشر أناتومي اقرأوها وحاولوا تفهموا الكلام ودايماً أول مرة حتاخد وقت أكتر شي.. ما اتوقع حتقدروا من اول مرة تحفظوا وتقهموا كل شيء وخصوصاً اللكتشرز الطويلة مثلاً ال skeletal system أول مرة أمسكها طبعاً كنت وقتها بحاول احفظ كل شيء وبدون مبالغة قعدت عليها نص يوم وبرضو ما أحس ثبت في راسي شي وتش از غلط مرة.. اذا كانت اللكتشر فيها ديتيلز كثير بعد ماتمروا عليها كلها قسموها لجزئيات وكرروا لين تثبت وبعدها روحوا للي بعدو. دا الشيء ممكن بس في البداية بعدين حتتعودوا على الطريقة

٢- نصييحة من قلب ذاكروا اللابات اول بأول مره حيساعدكم كتيرر بعد ماتفهموا لكتشر الجزء النظري (the theoretical part) روحوا المعمل وشوفوا المجسمات حتثبت معلوماتكم مرررة وصوروا فيديوهات وانتو بتشرحوا وتأشروا على المجسمات واسماءها حيفييدكم كتيرر وقت الفاينل والله (اللاب اختبرناه وقت الفاينل ووقتها ماكنا نقدر ندخل المعمل طول الوقت وعلى اخر كم يوم خلاص قفلوه عشان يجهزوا للاختبارات)

▪️ بالنسبة للاب، كانت تنزل لنا على البلاك بورد لستة فيها الاشياء الي معانا وصور للأعضاء ( موجودة في الدرايف ولكن انتبهوا ممكن يكون في اختلافات فأعتمدوا الي ينزلوها لكم). أنصح انكم تذاكروا من نفس مجسمات المعمل ( مو من صور النت ولا السلايدز) صوروها وأشروا عليها وخليها مرجع ليكم لأنو الاختبار (OSPE) حيكون على نفس المجسمات. خصوصاً لكتشر العضلات حتكوون مرة كتيرة فاللي سويته انا وصحباتي رحنا المعمل قبل أسبوع الفاينل وفتحنا فيديو يوتيوب وسرنا نتابع معاه ونشوف دايركت على المجسم وصورنا فيديو كمرجع لنا.

مثال لفايلات سووها صحباتي دينا وشهد ونداء الله يعطيهم العافية للاب ال skeletal system: ‏https://drive.google.com/file/d/1FsIVglcZJzJC91XfbFRq1bQDEHInBUE-/view?usp=drivesdk ‏https://drive.google.com/file/d/1uG8gNZFen16tFOKZBkD_UiU4To7lyAQV/view?usp=drivesdk ‏https://drive.google.com/file/d/1ww3zSWJNhFK8P93jSAKrM1djkJEs1sjo/view?usp=drivesdk

وهنا صور مجسمات لاب البنات:

https://drive.google.com/file/d/11Q0vOQ0C3ZXsOCvnsyiB5VEuHXEuyGt6/view?usp=drivesdk

وقسم الميل سووا ملفات مرتبة لكل سستم بالمجسمات الموجودة عندهم في اللاب وعليها الأرقام:

https://drive.google.com/drive/folders/1-q7iWcAlYDplQebQIMXM4vauOd0Iurll

وهذا كويزلت لكل اللابات مفيد لتثبيت المعلومات: ‏https://quizlet.com/kosh934/folders/ospe-anatomy-physiology-ksau-hs-pmed-2019

(لستة الأوسبي ماكانت موحدة بين الأولاد والبنات لكن الاختبار موحد فإحنا أشرنا على الموحد بيننا وذاكرناه)

▪️اختبار الأوسبي OSPE عبارة عن صور أو مجسم واحنا نكتب (كتابة بخط اليد) اسم المجسم أو العضو واختبرناه عملي في اللاب (المجسمات تكون مرقمة أو يحطوا إشارة على الشيء المطلوب)، لكن للأسف جاتنا اسئلة كثيير من الثيوريتكال في الأوسبي.

🔴 كل المواد الي فيها لاب لهذا السمستر حيكون إختبارهم أوسبي، بعضها في المعمل زي الأناتومي والفسيو وبعضها في لاب الكمبيوتر.

▪️وقت الفاينل خلوكم اذكياء وذاكروا الاشياء الي متأكدين انو حتجي منها واستغنوا عن بعضها مثلاً اول لكتشر اناتومي وفيسيو كلها تعريف خلوها في النهاية اذا مداكم الوقت. ابدأوا بالمهم والجديييد واللكتشرز الي لها لابات داخلة معاكم في الأوسبي والباقي اذا مداكم ذاكروه اذا لا اعتمدوا على ذاكرتكم وتوفيق ربنا.

▪️‏بالنسبة للإختبارات و د. كروتيكا.. أتوقع الاغلب سامع عنها اشياء مو كويسة وانها تجيب اسئلة من برا المنهج وغيرو.. لكن للأمانة ميد١ و٢ ماجانا شيء من برا بس ميد٢ كان ديتييلز وجات اسئلة من الصور والبعض مانتبه لها. الفاينل كان مستواه أعلى من الميدات والاختبار ماكان كلو دايركت، وجابت لنا كيسز.

بالنسبة لشرح الدكتورة عن نفسي ماكنت أفهم منها شيء وقت اللكتشر إلا نادرًا، هيا جراحة وعندها علم مرة ماشاءلله لكن ما أحسها تعرف تبسط وتوصل لنا المعلومات، كنت أعتمد على نفسي والstudy group وإذا مافهمت شيء أرجع لها *رأي شخصي ممكن غيري يختلف معايا في دي النقطة*

◾️CBL:

في كل بلوك توجد CBL case مختلفة. (case based learning). حيث سنجتمع مع دكتورة المادة لمناقشة الحالة وأهم الأهداف بعد الاستعداد لها وقراءتها والبحث عن الأهداف في المنزل. كل CBL كان اختباره مع اختبار البلوك.

مثال على واحدة:

كل الحالات cases كانت مذكورة في block book حيث يمكنكم قراءتها والتجهيز لها عند بداية البلوك في حال رغبتم. المطلوب من الجميع المشاركة - ويختلف باختلاف الدكتورة - للحصول على درجة المشاركة. ولابد من قراءة الحالة والبحث عن الأهداف المطلوبة للفائدة وإن لم تشدد الدكتورة على ذلك.

Physiology: 🔵

علم وظائف الأعضاء أخف من الأناتومي بكثير وأغلب اللكتشرز سهلة باستثناء كم وحدة. ومثل ماذكرت فوق، بعد ماتنتهوا من سستم معين في الأناتومي وتعرفوا الأعضاء حتاخذوا آلية عمل هذا السستم أو موضوعات محددة عنه في الفسيولوجي. الفيديوهات مفيدة تثبت وتسهل عليكم الكونسبت. الاسئلة ماتخرج من السلايدات وواضحة مرة بس في الفاينل لكثرة الكمية ماكان في وقت اننا نرجع لكل اللكتشرز. درستنا د. إيمان رئيسة قسم الساينس وحبوبة مرة.

▪️المادة لها لاب وكانت لابين فقط وداخلة في نفس الأوسبي حق الأناتومي.

🔴 قبل الفاينل سوولنا اختبار تجريبي للأوسبي وشرحولنا الوضع وتقريباً كلنا طلعنا واحنا ماحلينا إلا سؤالين بالكثير صح.. طبعاً دا الشي طمني وقتها انو الكل زيي لكن لاتسووا زينا🙆🏻‍♀️😂

Batch 5&9: المختلف عن الدفعة السابقة هو نظام البلوكات. كل بلوك له اختبار مختلف. ولكن OSPE يجمع كل جزئيات اللاب.

Block 1:

Introduction to anatomy & physiology and body coverings, muscles, skeletal system, endocrine system, CBL orthopedic case, and associated lab.

Block 2:

Nervous system, cardiovascular system, eye and ear, lymphatic system, CBL (cardiovascular system - Angina pectoris), and associated lab.

Block 3:

Respiratory system, digestive system, urinary system, reproductive system, CBL (Digestive system - Appendicitis), and associated lab.

💡 لاتروحوا الاختبار مواصلين حتى لو ماختمتوا. غلطتي وأكتر من وحدة من صحباتي اننا رحنا مواصلين يومين تقريبًا ومن قوة التعب وقت الإختبار محنا قادرين نركز.

💡بشكل عام لاتسمعوا لهم لما يقولولكم وقت الفاينل حنركز على الجزئية الجديدة فقط وشوية من القديم لأنهم سوولنا سبرايز (بناءً على تجربتنا وممكن يختلف الوضع معاكم). الأولوية في مذاكرتكم للجديد طبعًا وبعدها حاولوا تراجعوا ماستطعتم من القديم.

2️⃣ Principles Of Diseases:

هذي المادة مكونة من ٣ بلوكات. حتخلصوا من بلوك وتختبروا فيه وتنتهوا منه ومايدخل معاكم في الفاينل.

🔵 Immunology:

أول بلوك هو علم المناعة ممتع جدددًا وبسيط بس المشكلة الي واجهناها هي مصادر المذاكرة، سلايدات جدة كانت غير واضحة وكأننا فاهمين كل شيء وكنا نواجه لخبطة بين سلايدات جدة والرياض في البداية وطالبونا بأننا نذاكر منهم الاثنين بالرغم من ان الي بينشرح لنا سلايدات جدة فقط، لكن اشتكينا كثير وفي نص البلوك سار الشرح على سلايدات الرياض وهيا أوضح وأسهل بكثير.

البلوك كله ١٦ محاضرة وكان عندنا وقت كافي اننا نذاكرها أول بأول ونفهمها بما إنها في بداية السنة وكان اختبار البلوك أول ميد لنا. اللكتشرز الأولى كانت غير مفهومة لنا أبدًا وضيعنا وقت كثيررر عليها ونبحث في قوقل ومصادر متعددة عشان نفهم لكن في الأخير أغلببه إذا ماكان كله رجعنا درسناه في اللكتشرز الي بعدها بتفصيل أكثر، خصوصًا أول لكتشر ونفس المس حتقولكم دا الشيء.

المادة يحتاجلها فهممم أكثر من حفظ باستثناء اخر كم لكتشر كان فيها أمراض وجدوال مطلوب مننا حفظها. المس كانت تشرح لنا ديتييييلززز كثيييير مو مكتوبة وهذا الي ضيعنا لأن الي بتقوله مو مكتوب والكتاب الي حاطينه لنا كمرجع كان أسلوبه صعب شوية وماناسب الأغلبية

‏Kuby https://drive.google.com/open?id=1xuZI4qcRi80e_uHjScP4ZOd3qlXIIdbn

‏Lippincott وموجود كمان كتاب ‏https://drive.google.com/open?id=0BwaBo7T2zDi9ajkyM3ZWQjdjTjA

▪️فبالنسبة لمصادر المذاكرة صراحةً ضعنا كثيررر وكل أحد أستقر على الي يناسبه فحأذكر لكم كل الطرق المختلفة الي مشيوا عليها طالبات دفعتي:

🔹 البعض أعتمد على السلايدات والفيديوهات وكلام المس، يعني نكتب كلامها وكل الي تقوله من خارج السلايدات ونذاكرها ومانتوسع في شيء ماقالته لأن الإميونو بحر واحنا بناخذ فقط جزء بسيط ومو مطالبين بالباقي وإذا مرة مافهمنا نرجع للكتاب الي حأذكره في النقطة الي بعدها. ( أنا شخصيًا كنت أتبع دي الطريقة بس في بنات ماكان يناسبهم شرح المس أبدًا)

🔹 البعض أعتمد على كتاب basic immunology أسلوبه حلوو وبسييط ويفهم مررة كويس كنت أرجعله كثير في البداية. إذا حسيتو انكم ضايعين أقرأوا منه للفهم مرة حيسهل عليكم وبعدها أرجعوا ذاكروا من السلايدات.

لكن لاتتوسعوا كثير، الكتاب حلو جدًا للفهم والقراءة لكن لاتذاكروا أشياء انتو غير مطالبين فيها وتلخبطوا نفسكم.

تلقوه هنا في قناة التيليقرام https://t.me/medicallibrary2 ، اكتبوا اسم الكتاب في السيرش ويطلعلكم. وانا محملته على الدرايف حقي PDF ‏https://drive.google.com/file/d/1OoeLzSNmtJHLKq_5yzoh-9dp3X2pJmwt/view?usp=drivesdk

🔹 البعض كان يسمع فويسات دكتورة الرياض (د.دنيا) ويقولوا ان شرحها حلو ويفهم.

🔹 بعضهم كانوا يسمعوا لدكتور الأولاد ويمشوا على كلامه. ( قسم الميل كانوا يسووا نوتس لدكتورهم وتلقوها في الدرايف)

🔹 قناة مفيدة لل “Immunology”

‏https://www.youtube.com/playlist?list=PLAB2FC119A2CA3C57

◾️نجي للإختبار كان جدددًا سطحي وبسييط الحمدلله وانصدمنا من سهولته. ماتذكر لو جات اسئلة من الشرح ومو مذكورة في السلايدات بس كان الاختبار جددًا سهل والأغلبية جابوا الفل مارك. (بناءً على تجربة دفعتي)

◾️البلوك له لاب وأخذناه نظري في كلاسين. وحتختبروه أوسبي مع فاينل الباثو (آخر بلوك).

🔵 Microbiology:

هو البلوك الثاني وحتدرسوا فيه أنواع ال Microorganisms من بكتيريا وفيروسات وغيرهم وخصائصهم. البلوك كان ١٧ محاضرة وأكبر سيئة لدا البلوك في نظري انو كنا ناخذه في عززز إختبارات ميد١ لكن كان عندنا أسبوع عشان نذاكره كله. كان هو ميد٢ لمادة البرنسبل.

المادة دسمة شوية من ناحية المعلومات ويحتاج لها تفريق ومقارنة بين الأنواع وحفظ اسماء البكتيريا وخصائص كل نوع والتقسيمات، فلذلك موقع sketchy microbiology كان يساعدنا كثيررر وعن نفسي وأغلب صحباتي كنا معتمدين عليه خصوصًا في جزئية البكتيريا لأنها كثيرة. الموقع عبارة عن إنه يعرض المعلومات بطريقة فيديوهات كرتونية ويمثلها على شكل قصة ويربط لكم كل شكل بمعلومة، أحيانا ممكن تلاقوا معلومات زايدة في الفيديو مو مذكورة عندنا فسوولها سكيب وممكن تلقوا اشياء ناقصة مذكورة عندنا ومو موجودة في الفيديو فكنا نضيفها في الصورة كمرجع لنا. الموقع بفلوس لكن فيه قنوات تيليقرام توفّرها وبإمكانكم تبحثوا عنها.

وهنا في درايف دفعتي تلاقوا ملخص للفيديوهات، عبارة عن صورة متكاملة للمشهد وعليها المعلومات الأساسية:‏https://drive.google.com/drive/folders/1-TZNbNlwQ_mYjmK5eB3Q2qS9ukrUQDQJ

^ هذي الطريقة كنا نتبعها في اللكتشرز الي درستنا هيا مس نورة، لكن مع مس ابتهال كنا نذاكر ونركز بس على الي تقوله ونعتمد على تشبيهاتها وقت الشرح وأحيانًا تأشر لنا النقاط المهمة.

حتلاقوا في درايف دفعتي نوتس لكل لكتشرز المايكرو سواء مس نورة أو ابتهال، ويُفضّل انكم تسووا لجنة لدي المادة لدفعتكم في حال درستكم مس ابتهال.

◾️حتلاقوا خصائص كثيرر متشابهة فمثلًا ممكن خاصية وحدة تلاقوها متكررة لأنواع كثير بينما في أنواع ثانية تكون غير موجودة، فلذلك الملخصات مهمة مرة مرة مرة. المنهج معلوماته كثيرة ويحتاج انكم بعد ماتخلصوا تراجعوا وتلموا معلوماتكم عالسريع.

◾️ وانتو تذاكروا حاولوا تربطوا المعلومات بقصص ولا أي طريقة ربط تجي في بالكم لأن الحفظ لوحده حيكون متعب.

◾️ مايحتاج كتاب أبدًا، السلايدات كافية وأصلًا معلوماتها كثيرة فالأفضل تركزوا عليها بس.

◾️ بالنسبة للإختبار قالولنا انه راح نسألكم عن الأشياء الأساسية والواضحة في كل نوع لأنه في كثيررر اشياء متشابهة، وفعلًا ماتذكر جات اسئلة كثيرة على الخصائص المشتركة والي تلخبط لكن الاختبار كان مو بسهولة الإميونو وجاتنا كيسز وسؤال من الشرح. نماذج التجميعات مهمممة جدًااا جدًا.

◾️ المادة لها لاب وحيكون في المعمل. كانت ثلاثة لابات وحتختبروا عليه أوسبي مع فاينل الباثو.

🔵 Pathology:

علم الأمراض وهو آخر بلوك واختبرناه في الفاينل. المادة ممتعة كفهم لكن كان الوقت ضيق جدًا وتقريبًا بدأنا نذاكره قبل الفاينل بفترة بسيطة.

◾️السلايدات كافية لكن المادة ما أعطُيت حقها في الشرح للأمانة. اختبار فاينل الباثو يجينا من الرياض وهما يحطوا الاسئلة فلذلك أعتمدنا على تسجيلات الرياض (د.عمير) شرحه جددًا ممتاز ويفهم مرة لكن لضيق الوقت عملنا لجنة واتقسمنا اللكتشرز وسوينا نوتس وتلقوها في درايف الدفعة.

◾️ البلوك اختبرنا فيه أوسبي وقالوا لنا ان الاسئلة حتكون على الصور من نفس اللكتشرز، يعني ماكانت تنزل لنا سلايدات مخصوصة للاب الباثو وهذا الشيء تعبنا مرة لأن بعض الصور في اللكتشر مايكون مكتوب عليها شيء ولازم احنا نستنتج بنفسنا. في طلاب جمعوا الصور الي في اللكتشرز كلها في فايل واحد وتلقوها في الدرايف. والبعض كان يرجع لكتاب Robbin ويستفيدوا من الكلام المكتوب على الصور. (مو كل الصور موجودة في الكتاب لأن بعضها من النت)

https://drive.google.com/open?id=0B02ZCBdtmhfyVjlXd3pVMVpES0k

◾️ يوم الفاينل كان معانا لكتشرز الباثو -١٥محاضرة- (وفي نفس الوقت تذاكروا لصور الأوسبي) + لاب الإميونو + لاب المايكرو بالإضافة لحفظ الspelling + اتفاجأنا ان الCBLs داخلة معانا لكن صراحة كثير سحبوا عليها (حأتكلم عن الCBL تحت).

◾️ بالنسبة للاختبار الورقي الدفعة الي قبلنا قالوا لنا انو أغلبببه جا من نماذج تجميعات الرياض فأحرصوا انكم تشوفوها، لكن لدفعتي ماكان نفس الوضع. بشكل عام مستوى الاختبار يعتمد على مذاكرة الشخص، ف اللي ذاكروا كويس وقدروا يلموا المنهج قالوا انه كان كويس ماعدا جزئية الCBL.

أما بالنسبة لإختبار الأوسبي فكان في معمل الكمبيوتر ويشمل لابات الإميونو والمايكرو وصور الباثو - التجميعات مهمممة-، يعرضوا لنا صور ونكتب الاجابات في ورقة خارجية. حأتكلم من وجهة نظري الاسئلة الي جات للمايكرو والإميونو كانت مباشرة وواضحة بس البنات واجهوا صعوبة في الاسبلنق فركزوا عليه. أما لجزئية الباثو كانت الاسئلة كثيرة جدًا يعني السؤال الواحد له فقرتين والوقت ضييق وكان صدمة لنا صراحةً لأننا مو عارفين الوضع كيف يعني عبال مانفتكر الاجابة وعبال مانكتب ياخذ وقت مرة. انتبهوا وركزوا على المكان الي بتكتبوا فيه ولازم يكون مطابق لرقم الشريحة الي معروضة لكم، لأن أغلبنا لخبط وكتبنا إجابة سؤال في مكان غلط لسؤال ثاني.

🔴 اختبار الفاينل والأوسبي كانوا في نفس اليوم.

Batch 5&9: المادة أيضاً بلوكات كما كانت في السنة السابقة لكن الاختلاف:

Block 1: immunology

Block 2: Pathology + Microbiology

Block 3: Pathology + Microbiology

حيث قسمت مادتي المايكرو والباثو على بلوكين لغرض التخفيف والتنويع. في السابق كان بلوك ٢ عبارة عن مايكرو فقط وبلوك ٣ عبارة عن باثو فقط.

كما في مادة الأناتومي، توجد كلاسات CBL لكل مادة (اميونولوجي، مايكروبيولوجي، باثولوجي) ، لكن الفرق أننا سنختبرها جميعاً في الفاينل وليس مع اختبار البلوك مفردة ) - ونظراً لجائحة كورونا، لم نختبر cbl وإنما قمنا بعمل assignments)

OSPE: بالنسبة للباثو، كان مطلوب منا مذاكرة الصور لكن في الاختبار وجدنا أغلب

الأسئلة تتطلب فهم للمحاضرة نفسها وليس الصور فقط.

3️⃣ Pharmacology:

مادة علم الأدوية ومن اسمها واضح هي تتمحور حول ايش. في البداية حتدرسوا عن مواضيع عامة في الفارما وأغلبها فهم وسهلة وحتختبروا فيها ميد١، لكن جزئية ميد٢ والي بعدها حتكون هي بداية الفارما الحقيقية وتبدأ الأدوية الكثيرة وحتاخذوا عن ال Antibiotics, Antiviral, Antifungal وأنواع أخرى للأدوية وأقسامها.

◾️ المذاكرة من السلايدات كافية جدًا وما أحتجنا نرجع لأي مصدر خارجي. كانت تدرسنا مس ياسمين وشرحها مفييد خصوصًا اللكتشرز الأولى وتعيد المعلومة اكثر من مرة لين نحفظها، واطلبوا منها تساعدكم وان شاءلله ماتقصر. جزئية الفاينل جاتنا مس جديدة (د. نصرت بانو) وحبيناها أكثرر، شرحها سريع لكن الحلو انها تعطي الزبد وبنفسها تقول ركزوا في كلامي واعتمدنا عليها في كل شيء. الاثنين ينبهونا على النقاط المهمة ولذلك الحضور مهم واحنا البنات سوينا لجنة لنوتس الفارما لكل اللكتشرز تلقوها في درايف الدفعة.

◾️أنصح بالملخصات زي ماذكرت في المايكرو حتفيدكم كثيررر للمراجعة لأن الأدوية وأنواعها كثيرة وتحتاج تثبيت وتفريق، وخصوصًا وقت الفاينل عن نفسي ملخصات الميدات فادتني كثيرر لضيق الوقت. وكمان ربط المعلومات مهم حاولوا تسووا قصص أو أي طريقة تربطوا بيها معلوماتكم ببعض عشان تحفظوا الأدوية أو حتى لو تتعاونوا بينكم وكل وحدة تمسك لكتشر حتخففوا عن بعض كثير،

وهنا مثال لتشبيهات صحبتي نورة للكتشر Drugs affecting the Autonomic Nervous System:

https://drive.google.com/drive/folders/19oFxbcjvX0owH73QCJwYtWCSq8eUI-P3

◾️ بالنسبة للاختبارات ميد١ و٢ سهلة ومباشرة لكن الميد الثاني معلوماته أكثر، أما الفاينل كان مستواه أعلى وكان داخل معانا لكتشرز الميدات كلها بالإضافة لجزئية الفاينل الجديدة.

4️⃣ Histology and Embryology:

الهيستو هو علم الأنسجة والإمبريو علم الأجنة. المادة مهي نظام بلوكات، ميد١ كان هيستو، ميد٢ هيستو و٤ لكتشرز إمبريو، الفاينل اختبرنا ٦ لكتشرز جديدة للإمبريو بالإضافة لمنهج الميدات كله للاثنين هيستو وإمبريو.

🔵 Histology:

بدأنا في الهيستو من بداية السمستر ومافي شيء كثير أقوله عن دي المادة هي معلوماتها كثيرة ونذاكر من السلايدات الموحدة مع الرياض ولكن لاتشيلوا همها. كانت تدرسنا د. كروتيكا والأولاد دكتور عبدالله آل جرمان الله يسعده.

بالنسبة لنا البنات ما كنت اشوف الكلاسات مفيدة للأمانة لأن الوضع غالبًا قراءة والمعلومات تتطلب حفظ وسوينا كمان نوتس لد. كروتيكا موجودة في الدرايف.

المادة تقريبًا كلها حفظ وصراحةً كانت اكثر مادة ساحبين عليها كلنا الين قبل الاختبار بفترة. ميد١ و٢ عن نفسي والأغلبية ذاكرنا كل شيء وركزنا عالنقاط المهمة لكن فيه بنات ماذاكروا إلا المهم فقط ومشي الوضع الحمدلله. جزئية الفاينل ذاكرنا المهم فقط لضيق الوقت وركزنا اكثر على مذاكرة الإمبريو.

◾️ المادة لها لاب وتنزل لنا سلايدت خاصة له. اختبار الأوسبي كان في نفس يوم الفاينل وكان سهل جدددًا ومن نفس اسئلة السلايدات ولا تشيلوا همه. ضروري يكون في تعاون بين قسم الميل والفيميل لهذي المادة.

💡 الهيستو و الأناتومي لو تذاكروهم مع بعض ( يعني مثلًا تذاكروا لكتشر الأناتومي وبعدها أقرأوا الهيستو) مررة حيفيدكم لربط المعلومات لأنه مرات يذكروا معلومة بشكل ناقص وهي تكون مذكورة في الاناتومي و العكس..

🔵 Embryology:

المادة ممتعععة جدددًا ومرة مرة حلوة وصراحةً حبيتها أكثر من الإميونو، هي عبارة عن مراحل نمو الجنين وكيف يتكون لكن عيبها هو سلايداتها جدددًا سييئة وتلخبط الواحد ونجلس نحوووس عشان نفهم معلومة بسيطة. السلايدات من الرياض فالحل اننا كنا نرجع لكتب نقرأ منها ونفهم وبعد كذا نرجع نذاكر السلايدات. كانت تدرسنا د. كروتيكا وصراحةً كانت تشرح كويس وترسم لنا لكن المشكلة انه في وسط الاختبارات ومحد مركز معاها أصلًا وماكان في وقت نعمل لجنة نوتس لأن شرحها كله رسم على السبورة وتمسح وترسم المرحلة الي بعده وهكذا.

في نص المادة تقريبًا سألتنا اذا كنا ضايعين ومو فاهمين شيء وطبعًا كلنا بصوت واحد جاوبنا ب إيوا، سوت لنا كلاس تلخيصي لكللل المراحل بشكل مختصر، طبعًا وقتها ماكنت فاهمة ولاشيء بس احاول ارسم معاها واكتب الي ألحقه لكن بعد ماخلصت مذاكرة وقت الميد ورجعت للملخص ساعدني كثير وجمع أفكاري، فـ اذا ماسوت لكم أطلبوا منها اذا حابين.

أكثرررر مادة ضروري تشوفوا فيها فيديوهاات، قبل ما ابدأ اللكتشر كنت اشوف فيديو عن الموضوع ويسهل عليا كثيرررر مرة، القناة هذي حلوة لكن مو شرط تعتمدوا عليها بس، اكتبوا اسم موضوع اللكتشر ويطلع لكم اكثر من فيديو

‏ https://www.youtube.com/user/AnimatedEmbryology

الكتاب اسمه Langman’s Medical Embryology جددًا أسلوبه بسيط وسهل وموجود في جرير، لكن برضو كنا نواجه صعوبة في فهم بعض الجمل في السلايدات وهنا تقدروا ترجعوا تتأكدوا من المس لأن اكتشفنا كم معلومة غلط في السلايد.

وهنا تلقوا الكتاب PDF‏https://drive.google.com/open?id=0BwaBo7T2zDi9RWIzbW0yVEVJMzg

وهذا كتاب تاني اسمه The Developing Human (Moore) ومدحوه البنات كمان لكن أنا شخصيًا كنت معتمدة على الأول‏https://drive.google.com/open?id=1yc1xCGfQa38-1AhQjG3LtYcilHNRQjVK

◾️بالنسبة للاختبارات الهيستو وضعه تمام وميد الإمبريو كمان كان مباشر وسهل لكن في الفاينل جزئية الإمبريو كانت أصعب شويتين وجاتنا cases.

◾️المادة مافيها لاب واختبار الأوسبي كان هيستو فقط.

5️⃣ Education:

هذي المادة تقريبًا زي وضع البيهيفيور سمستر٣، فيها لكتشرز كثير من الحياة العامة وحتى ماينحفظ فيها شيء كان الوضع قراءة بتركيز فقط، بس في المقابل في كم لكتشر وخصوصًا جزئية الفاينل يتطلب فيها حفظ وبعضها أصلًا مو مستوعبين ايش الموضوع بس نحفظ ونمشّي. تقريبًا كل دكاترة الساينس مرّوا علينا في دي المادة، يعني مافي دكتورة محددة.

مايحتاج لها مذاكرة أول بأول وكنا نمسكها قبل الاختبار بكم يوم ويمشي الوضع، بس المراجعة مهمة لأننا واحنا نذاكر كنا نحس مذاكرتنا تسليكية بما ان أغلبه قراءة وأشياء منطقية باستثناء كم لكتشر.

◾️بالنسبة للاختبار المادة لها ميد واحد فقط وفاينل. الاسئلة ماتخرج من السلايدات والمسز بنفسهم يقولولنا. مهم مرة تتطلعوا على نماذج الي قبلكم لأن أغلب الاسئلة مكررة خصوصًا في الميد، لكن الفاينل كان مستواه أعلى والأسئلة ديتيلز أكثر وجاتنا كيسز.

◾️ على الشهر الأخير تقريبًا بدأنا ناخذ لكتشرز عن ال PBL (Problem Based Learning) وبعدها سوولنا تدريب وعلمونا عن طريقته وخطواته وكان الحضور مهم وعليه درجات.

◾️ على نهاية السمستر كان فيه زي البروجكت عن الريسيرش وبسيط مرة. أخذنا لكتشر عن الريسيرش مع د. رغد وشرحت لنا آلية البروجكت. عبارة عن اننا نختار ورقة بحث ونقرأها ونفهمها (عن نفسي والأغلبية أخترت أكثر ورقة فاهمتها وتكون مناسبة للمتطلبات من بحثي الإليكتف حق سمستر٣) وبعد كذا نجاوب ونعبي البيانات في الفايل الي نزلوه لنا على البلاك بورد.

◾️ واخر شيء برضو طلبوا مننا نشاط ثاني على البلاك بورد وهو إننا نختار كم لكتشر معينة من نفس المادة ونكتب كيف استفدنا منها في حياتنا.. الخ.

Batch 5&9: الفرق الوحيد كان إضافة أساينمنت Survey. كان المطلوب منا فقط الإجابة على عدة أسئلة في استبيان لبحث ونحصل على الدرجة 5% ولا توجد إجابات خاطئة بالتأكيد.

6️⃣ Ethics:

مادة تتمحور حول أخلاق الطبيب وكيف نتعامل مع المرضى وفيها بعض الأحكام الدينية. درستنا د. أريج و د.فايزة العدواني (العميدات وهم دكاترة في المستشفى كمان) + مس نادية تخصصها عقيدة وشريعة.

بشكل عام المادة حلوة وخصوصًا لما الدكاترة يحكونا عن مواقف المستشفى وفي اشياء في المنهج منطقية بس الكلاس طويل ساعتين وكثيرررر بنات كانوا يسحبوا لكن في النهاية قالوا لنا ان الحضور عليه درجات، والمفروض يكون فيه مشروع للمادة بس حيخلوا درجاته على الحضور؛ فلذلك أسألوا من بدري واحرصوا على الحضور.

أكثر صعوبة واجهناها هي لخبطة مصادر المذاكرة. أولًا بعض السلايدات كانت غير موحدة بين الميل والفيميل بالرغم من ان الاختبار موحد. ثانيًا كانت تنزل لنا سلايدات لكل لكتشر، بالإضافة لملزمة وكتاب وقبل الإختبار بكم يوم صدمونا بأن المصادر الثلاثة معانا.

طبعًا اختلفنا وقتها وكل أحد أعتمد على المصدر الي يبغاه لأن مستحيل نقدر نغطي المصادر ال٣ في ذاك الوقت، فيه من اعتمد على السلايد فقط والبعض يرجع للكتاب في النقاط الغير واضحة في السلايد... الخ. الكتاب حلو ويشرح بأسلوب بسيط لكنه كثير وكان الوقت ضيق. الملزمة من إعداد دكاترة جامعتنا نفسهم وعجبتني مرة وكنا نعدّي عليها قراءة وفي بعض اللكتشرز نفسسها بالحرف مكررة في السلايد والملزمة.

أنا شخصيًا اعتمدت على السلايد والملزمة ومافتحت الكتاب أبدًا وكان تحليلي وقتها (ليش حيتعبوا نفسهم ويسووا ملزمة وفيها أشياء مستنبطة من الكتاب؟ أكيد انها مهمة) وفعلًا تحليلي الحمدلله كان في محلّه😂👏🏼 جاتنا عدة اسئلة من الملزمة ومن ضمنها دليل واحنا نختار وجه الدلالة. ماكانت معانا أسماء الرواه للأحاديث.

الدفعة الي قبلنا قالوا ان الاسئلة تجي من كلامهم وشرحهم والقصص الي يقولوها لأن الاختبار أغلبه كيسز ومواقف، كنت أحضر وأحاول اكتب نوتس بالرغم من ان الشرح كله حكاوي ومواقف توضيحية للنقطة المكتوبة في السلايد، وفعلًا الميد كان عبارة عن حالات واحنا نختار التصرف الصحيح وهكذا وما أتذكر صراحة لو جا من كلامهم أو لا لكنه يعتمد بشكل كبير لفهمنا للتصرف الصحيح في الحالة المذكورة. انتقدنا الاختبار من جوانب كثييرة ومن ضمنها الأخطاء الإملائية وبعض الكلمات ماكانت مُشكّلة بالحركات والبعض قرأها وفهمها بطريقة أخرى غير المقصودة منهم. فلذلك مهم مرة تاخذوا فكرة عن تجارب الي قبلكم في الاختبار وتتطلعوا على النماذج.

الفاينل كان أحسن بكثير من وجهة نظري والأغلبية وتقريبًا كله من السلايدات والمنطق والتجميعات.

Batch 5&9: تم رفع كتاب للمادة في البلاك بورد (٩٠ صفحة تقريباً) ولم يطلب منا مذاكرة سواه.

لم يطلب منا مشروع قبل أزمة كورونا. ولكن بعد ذلك أصرت دكتورة المادة على طلب مشروع بحيث أنه سيساعدنا في التخفيف من نسبة الاختبارات وكان قرارها في محله.

تكون الاختبارات موحدة بين الفروع غالباً، ولكن نظراً لكون الدراسة عن بعد لم تكن موحدة. لذلك لم تكن الأسئلة فقط من الكتاب، بل كانت من الشرح كذلك؛ بخلاف الفروع الأخرى حيث أخبرونا أن الأسئلة كانت فقط من الكتاب.

🔵 CBL:‏

حتلاقوا في الجدول خانة مكتوب عندها CBL وعادةً تكون ساعتين. هي اختصار ل Case Based Learning وعبارة عن case ينزلوها لنا في البلوك بوك حق المادة من بداية السنة، والكلاس يكون مناقشة لهذي الحالة وتحتها اسئلة أو أوبجكتف نجاوب عليها.

حيكون لمادتين وماحتبدأوا فيه على طول من بداية السمستر يعني بعد ماتخلصوا جزئية معينة. الأناتومي له ٤ كلاسات CBL، بس أتوقع آخر واحد انحذف لنا لأنه ماكان في وقت. وPrinciple of diseases ٣ كلاسات بعد كل بلوك.

طريقة الكلاس تعتمد على المس، كمثال أول كلاس مع د.كروتيكا خلتنا نقسم نفسنا قروبات وكل قروب يشرح أوبجكتف معين وأخذنا الساعتين كاملة. الكلاس الثاني غيرت الطريقة وكانت هي تشرح لنا وتسألنا واحنا نجاوب ونناقش مع بعض بشكل جماعي.

🔴 بشكل عام حاولوا ماتسحبوا على الكلاسات كثير في بداية السمستر لأنكم حتحتاجوا السحبات دي في النهاية أكثر بالذات المواد الي غياباتها قليل زي الهيستو والإديوكيشن مثلًا.

__________________

تم بحمدلله🌟..

💡 أنوّه أن كل ماذُكر سواءً لسمستر٤ أو ٣ كان بناءً على تجربتي ولدفعتي Batch4&8.. وممكن يختلف الوضع في بعض النقاط الي ذكرتها على الدفعات القادمة.

كل ماكُتب بهذا اللون فهو من تجربة Batch 5&9 ، والشكر لـِ غدي الحربي، وكل من ساعدها: ضيّ الراشد، وعبدالعزيز الراشد. 🙏🏼

إن أصبت فمن الله وإن أخطأت فمن نفسي والشيطان، ان شاءلله أكون نقلت لكم التجربة على أكمل وجه وبكل واقعية.. واسأل الله لي ولكم التوفيق ولا تنسوني من صالح دعاؤكم❤️

أختكم/ مودة هشام الصائغ، اي استفسار أو تعليق هذا حسابي في تويتر والخاص مفتوح لكم جميعاً ✨

Twitter: @mawalsaegh

هنا بعض روابط تحميل الكتب الي ممكن تحتاجوها لسمستر٤، اترسلت لنا في بداية السمستر من باتش ٣&٧ الله يجزاهم خير 🙏🏼❤️

Semester 4 PDFs

ANATOMY

- Gray's https://drive.google.com/open?id=0B02ZCBdtmhfyb1Vqa0lpQ24zVTA

- Snell by Regions https://drive.google.com/open?id=0Bw-9jtibFAPfTGc5aFU0ekMyWW8

- Snell by Systems https://drive.google.com/open?id=0Bz5p4rlKuvakNzA2MTNmOTItNWRkOS00YThmLThjNjktYjVlNjcxM2YzOWQ3

- Moore https://drive.google.com/open?id=1Rb90sPF8kGdrUBDIjQvErceDp1EzeLmr

PHYSIOLOGY

- Sherwood's From Cells to Systems https://drive.google.com/open?id=0BwaBo7T2zDi9bXg4blBycFROcXM

EMBRYOLOGY