2nd year - Semester 3

بسم الله الرحمن الرحيم

◾️ Semester 3 :

السلام عليكم ورحمة الله وبركاته. حأتكلم هنا عن مواد السمستر الثالث للسنة الثانية بجامعة الملك سعود بن عبدالعزيز للعلوم الصحيّة- جدة، مسار موحد. 

💡 بدايةً، في هذا السمستر وبالرغم من كثرة الإختبارات ولكن عن كلام وتجربة الأغلبية، عندكم فرصة كبيرة إنكم ترفعوا معدلاتكم بإذن الله إذا اجتهدتوا وذاكرتوا أول بأول، لكن أكيد مارح يخلوا من بعض الضغوطات بحكم أن عندكم ٨ مواد.. حأتكلم عن كل مادة على حسب أهميتهم بالترتيب *في نظري*

1- Biochemistry❤️/ BIOC 211 (4 hours)
2- Biostatistics/ BIOS 201 (2 hours)
3- Medical Terminology/ ENGL 201 (2 hours)
4- Computer Science/ COMP 201 (3 hours)
5- Behavioral Sciences/ BHSC 201 (2 hours)
6- Elective/ ELEC 201 ( 1 hour)
7- Advanced Reading/ ENGL 212 (2 hours)
8- Advanced grammar + writing / ENGL 211 ( 2 hours)

⬆️هذي المواد للطب والأبلايد وممكن تكون في اختلافات بسيطة في المناهج، لكن النيرسنق حيكون عندهم أناتومي بدال البيهيفيور.

🔴 أول يوم ماكان عندنا دوام رسمي بسبب برنامج بداية خير للتحضيري.

🖇 بدايةً، أغلب المصادر المذكورة تجدوها في رابط الدرايف الخاص بدفعتنا batch4‍‍&8 للعام الدراسي ١٤٣٩-١٤٤٠هـ /

 2018–2019

🌟 تم تحديث المدونة بناءً على التغييرات الحاصلة لِـ Batch 5 & 9  للعام الدراسي ١٤٤١ هـ / 2019-2020 م ، جميع الإضافات والتعديلات ستُكتب بهذا اللون

كل الشكر لِـ غدي الحربي، ضي الراشد، عبدالعزيز الراشد.

بدايةً كانت أغلب الاختبارات موحدة بالكامل أو موحدة ٥٠٪ بين كل فروع الجامعة في الفصل الدراسي الثالث وكلها موحدة بالكامل في الفصل الدراسي الرابع - قبل الدراسة عن بعد -. أما بعد الدراسة عن بعد، أصبحت الاختبارات مختلفة لكل فرع. ووُحّدت اختبارات الفاينل بين قسمي البنات والأولاد.  

1️⃣ BIOCHEMISTRY: 

في هذي المادة حتتعلموا من فين بتُكتسب الطاقة (ATP) وكيف بتوصل لخلايا جسمنا وكيف بتتكسر السكريات والدهون والبروتينات، بشكل عام يتمحور حول الطاقة وطرق إكتسابها وهذا حيكون من خلال cycles و pathways للعناصر والمركبات وطبعاً الإنزيمات في كل عملية.. أكيد أغلبكم سمع عن هذي المادة وانها دسمة وإلى آخره وفعلاً هي أكثر مادة يحتاج إنكم تركزوا عليها خلال السمستر وتعطوها الأولوية في مذاكرتكم لأن أغلب المواد تقدروا إنكم تذاكروها قبل الإختبار بكم يوم لكن البايوكيم لا.. وحيكون فيها Lab🔬 (حأتكلم عنه تحت).

 

للأمانة الترهيب الي سمعناه عن المادة قبل ماناخذها كان مُبالغ فيه، ايوا صح تتطلب جهد وممكن تكون صعبة شوية وعلى قد دسامة المادة بس حقيقي ممتعة وتخليكم تستشعروا دقة الله في خلقه (وَفِي أنفُسِكُم أفلا تُبصِرُون) ومقدور عليها بإذن الله وال A,A+ فيها أبداً مو مستحيلة للي يجتهد وكثير من دفعتنا قدروا يجيبوها بفضل الله. 

في البداية حيكون الوضع سهالات ومهو صعب أبدًا وحتقدروا ان شاءلله إنكم تذاكروا أول بأول لكن البايوكيم الحقيقي يبدأ من لكتشر الglycolysis(تكسير الجلوكوز-السكر) بعد ميد١، من هنا حتبدأ الpathways والإنزيمات الكثيرة وتتطلب حفظ وإعادة أكثر من مرة عشان تثبت، ممكن أول لكتشر تنصدموا شوية زيي وتحسوا انه كيف تنحفظ وكيف حنقدر بس والله تتسهل مع الأيام وتبدأوا تتعودوا على النظام.. لما تبدأ الميدات طبيعي أن المحاضرات تبدأ تتراكم عليكم شوية وخصوصاً قبل الفاينل أغلبنا كان متراكم علينا كثير ونحضر الكلاس ونخرج واحنا مو فاهمين شيء وكلها سايلكز وبعضها مرتبط ببعض باختصار ضياااع، بس الحمدلله كان فيه أسبوع قبل الفاينلز تقريباً فاضي وقدرنا نلحّق🙏🏼 

💡 التفاصيل أبدًا مو للتخويف قد ما إني بأعطيكم نبذة عن تجربتنا عشان تكونوا في الصورة.

▪️كيف نذاكرها؟

 كانت عندنا ٣٠ لكتشر فعلياً بس ٤٥ لكتشر رقمياً لأنهم كانوا يدمجوا أكثر من محاضرة في فايل واحد. فيه لكتشرز كثيرة تعتمد على بعضها فمهم تذاكروا درس بدرسه عشان تفهموا اللي بعده، وحاولوا تربطوا اللكتشرز ببعض وقت المذاكرة خصوصًا السايكلز. بالنسبة لنا احنا البنات درسونا دكتورتين (د. فرحة + شيرين) والأولاد دكتور محمد الأسطورة😍

▫️-د.محمد تقريباً كل دفعتنا كنا معتمدين عليه ونسمع تسجيلاته (استأذنا منه وسمح لنا👌🏼) ونكتب نوتس لكلامه والملاحظات الي يقولها (موجودة كلها في الدرايف بس الأفضل تعملوا لجنة علمية لدفعتكم وتسمعوا بنفسكم وتكتبوا النوتس في حال أتغير حاجة في اللكتشرز). خلال شرحه أحياناً ينبه على النقاط المهمة ومثلاً لو فيه جداول مو مهمة أو ماتنحفظ يقولكم عليها.

▫️- د.فرحة درستنا في البداية الين أكثر من نص المنهج تقريباً، شرحها رهيب ويفهم جدًا لكن للأمانة ماكنا نستوعب كل كلامها وشرحها وقت الكلاس لعدة عوامل، وطبعاً مافي وقت إننا نحضّر فلما نبدأ الكلاس نكون لسا مو عارفين كل المصطلحات أو أسماء الإنزيمات فماكان مره سهل إننا نستوعب هي إيش بتقول بالضبط وإيش تقصد، لكن بعد ماتذاكروا إذا مافهمتوا شيء روحوا لها المكتب وماحتقصر معاكم تشرح من قلب. 

⭕️ مراجعتها مهمة جدًا وإذا ماسوت اطلبوا منها وأمشوا على كلامها والي تقوله. 

غالباً كنا نكتفي بتسجيلات د.محمد لضيق الوقت وممكن في حال إنكم مافهمتوا نقطة ترجعوا لها، واذا د. فرحة قالت على شيء مهم فهو فعلًا مهم ولاتسحبوا عليه أبدًا.

▫️- د.شيرين درستنا الجزئية الأخيرة وكانت ممتازة 👌🏼

💡 بعض صحباتي كانوا يسمعوا فويس د. محمد قبل كلاسنا مع د. فرحة أو شيرين ويسهل عليهم الفهم كثير. 

◾️كيف مستوى الإختبارات؟

 ضروري تكونوا حافظين وفاهمين لأن بعض الاسئلة ماتجي دايركت أو صيغة السؤال تكون بلفة.

 جزئية ميد١ بسيطة في المذاكرة وحتى الإختبار ماكان جدًا صعب، بعكس ميد٢ يتطلب جهد أكبر في المذاكرة والإختبار كمان، لكن في الأول والأخير يعتمد على إجتهادكم وتوفيق الله. في ميد١و٢ جاتنا cases وبعضها تربط أكثر من لكتشر مع بعض لكن موصعبة للي فاهم وحافظ ان شاءلله.

 الفاينل ما كان جداً صعب في نظري بس يحتاج انكم تكونوا ملمّين بالمنهج كله وعلى حسب ما أفتكر ان أغلب الاسئلة كانت دايركت بس يتطلب حفظ والتفريق بين السايكلز والإنزيمات وهكذا.. 

▪️هل يحتاج كتاب؟ 

لا أبداً السلايدات كافية جداً.

الكتاب شرحه جدًا مفيد ويفهم فممكن ترجعوا له إذا مافهمتوا نقطة معينة لكن الأفضل إنكم ماتشتتوا نفسكم بمعلومات إضافية من الكتاب لأن اصلاً معلومات السلايدات لوحدها كثيرة. 

🖇 الكتاب موجود في الدرايف.

▪️مواقع مفيدة؟

- قناة AK lectures في اليوتيوب: https://www.youtube.com/user/mathdude2012

 - قناة Ninja Nerd Science، يُنصح به جدًا، هو فيديوهاته طويلة بس يشرح ويفهم ويحفّظ مرة كويس، ومفيد لمواد ثانية مو بس البايوكيم:

https://www.youtube.com/channel/UC6QYFutt9cluQ3uSM963_KQ
- فيديوهات Osmosis

🔹BIOCHEMISTRY LAB🔬:

كانت عندنا ٦ لابات وتُعتبر سهلة وأغلبها قصيرة مافيها معلومات كثيير مرة وماتحتاج مذاكرة أول بأول. اللاب الواحد عبارة عن بور بوينت + كانوا ينزلوا لنا ملف ثاني كأنه وورد مكتوب عليه background الأفضل انكم تذاكروها الإثنين والحمدلله ما أفتكر إننا واجهنا صعوبة فيه إلا كم نقطة ممكن.

 في نهاية كل لاب حيكون فيه lab report نحله كمجموعة ويتم تصحيحها نهاية السمستر وتسليمنا هي قبل الفاينل للمذاكرة، كان البعض يخسر درجات فيها لذا من المهم حلها بشكل صحيح نظراً لأنها قد تكون عامل مساعد في رفع معدل المادة، والمادة ليست بتلك السهولة كل درجة فيها مهمة.

2️⃣ BIOSTATISTICS احصاء: 

المادة كانت ١١ محاضرة ومرة واحدة في الأسبوع (ساعتين).. في البداية عبارة عن تعريفات وبعضها نعرفها من قبل في الرياضات زي المتوسط والوسيط والمنوال والإحتمالات تقريباً ال٥ شابترز الأولى تدور حول هذي المواضيع. بعد كذا تبدأ المواضيع الخاصة بتقدير العينة وإختبار الفرضية (hypotheses testing) ومن شابتر٨ إلى النهاية كانت المواضيع تدور حول المقارنة بين أنواع مختلفة من إختبار الفرضية، بإختصار يعني different types of tests and each one has requirements or conditions which determine what test is suitable for the hypothesis.

 ممكن تمر عليكم مواضيع ماتعرفوا إيش هي بالضبط فذاكروها as it is يعني عليكم بالمكتوب ولا تعقدوا نفسكم. أكثر سؤال كان يجي في بالي وانا أذاكر "ليش بندرس هذي الاشياء؟ وايش فايدتها؟" وماعرفت الجواب إلا آخرالسمستر ألا وهو إننا حنحتاجها لما نسوي research مستقبلاً ان شاءلله.

▪️كيف نذاكرها؟

بدايةً، سلايدات دفعة ٥ بنات اختلفت عن الدفعة السابقة، بحيث كانت تغني عن الكتاب وفيها كل المعلومات المطلوبة وبعض التمارين. ونهاية كل محاضرة يوجد عدد من التمارين التي يفضّل حلها لإتقان الأفكار في كل درس. وطبعاً من الأفضل كذلك الرجوع للكتاب.

ومن المهم أيضاً عند الرجوع للكتاب مذاكرة الجزئية الخاصة بالدرس فقط والمذكورة في المحاضرة والباقي لسنا مطالبين به. 

المحاضرات بالنسبة لجزئية الفاينل اختلفت كثير عن الدفعة الرابعة. 

حذفت الكثير من الحسابات والقوانين. كان الاختبار عبارة عن جداول لاب نفسرها ليس إلا وكنا مطالبين بحفظ الإيجابيات والسلبيات لكل نوع test ولماذا يستخدم، ونحدد الnull & alternative hypothesis ونفسر النتيجة فلم يكن من الضروري التمرن من الكتاب على جزئية الفاينل لعدم وجود حسابات.

وكان المطلوب منا في الفاينل كذلك والأهم؛ مذاكرة جزئية اللاب للفاينل كما ذكرت نظراً لقلة المسائل الحسابية. بالنسبة لقسم البنات، جزئية اللاب للفاينل لم نختبرها في المعمل.

 الكتاب مفيد جدًا وشرحه بسيط (موجود في الدرايف وكل الجداول الي ممكن تحتاجوها موجودة أيضًا) والتمارين في نهاية كل لكتشر مفيدة.https://drive.google.com/drive/folders/10an-77KN1SFiCU3D6A4iQO2WaG8jU1uK 

 اذا مالحقتوا تذاكروا أول بأول خصوصاً بعد ميد١ فأعطوها حقها قبل الاختبار بوقت كافي ويمديكم ان شاءلله.

▪️يحتاج نشتري الكتاب؟

 لاا أبداً موجود في الدرايف وفي مكتبة الجامعة كمان اذا حابين تستعيروه لأنو غالباً مارح تحتاجوه مستقبلاً.
(للمعلومية: فيه نسختين من الكتاب القديم لونه أحمر والجديد لونه أخضر، مافي فرق بينهم أبداً بس الأخضر فيه كم شيء زيادة وكلها أرفقناها في الدرايف. الي موجود في مكتبة الجامعة هو الأحمر)

▪️الإختبارات:

 ميد١ بسيط وسهل وكان ٣ لكتشرز فقط وأغلبها تعاريف وحتى الاسئلة جاتنا دايركت مرة. ميد٢ كان ٤لكتشرز ومستواه أعلى بكثير وبعض الاسئلة جات بلفّة لكن مافي شيء خرج عن أفكار الكتاب والي يجتهد بإذن الله يلقى نتيجة تعبه. الفاينل الحمدلله كان سهل والأغلب كان مبسوط منه🙏🏼

💡احرصوا انكم تحفظوا القوانين بالرغم من إنها تجي في الاختبار عشان لاتضيعوا وقتكم ومرات ماتلقوا كل القوانين في الورقة.
- المادة فيها كويز أونلاين (في لاب الكمبيوتر) عليه ١٠٪؜ . بالنسبة للبنات كان الكويز في شابتر٨ (inferences from two samples) اللكتشر طويلة وفيها حل معادلات لكل تيست لكن سهلة والله بس يبغالها وقت وفهم وتفريق.

 (معلومة يمكن ماتكون مهمة: الكويز كان في نفس يوم ميد الكمبيوتر وباتش٣ كان كويزهم بعد ميد البايوكيم يعني إحتمال يجيكم في وقت تكونوا مضغوطين فيه).

▪️LAB🔬 

في نهاية أغلب المحاضرات كانت توجد جزئية لاب تشرحها الدكتورة نهاية الكلاس وتسمح بتصوير فيديو للشرح، بالنسبة للتدريب كان الأمر راجع لنا - نروح اللاب ونتدرب على البرنامج بنفسنا - . كنا مطالبين بمذاكرة جزئية اللاب لإختبار اللاب فقط ما عدا جزئية الفاينل كان من ضمن مذاكرة الإختبار النظري.

بالنسبة للاب كان على برنامج JMP.

◽️ كان لابين لقسم البنات 

• الاختبار الأول:

استخدمنا البرنامج للحل وكان سهل - بعد التدرب طبعاً -  ( جزء اللاب من لكشتر ١-٥ ) تقريباً كل جزئية ميد ١.

• الاختبار الثاني : 

ذاكرنا لكتشر واحدة ( رقم ٨ ) واستخدمنا الكمبيوتر للحل بدون برنامج JMP وكان مطلوب منا إحضار الآلة الحاسبة لوجود معادلة طويلة في الاختبار ( تم إعطائنا ورقة تحتوي على القوانين المطلوبة )

◽️بالنسبة لقسم الأولاد:

كان اختبار واحد بنسبة عالية (٢٠٪ )

اختبروا كل جزئية اللاب من محاضرة ٧ فما بعد.

تم استخدام نماذج مختلفة أثناء الاختبار وتم استخدام برنامج JMP في الاختبار.

قائد دفعة ٩ ( علي السديس ) جزاه الله خيراً قام بتصوير شروحات للاب ونزلها على اليوتيوب لتكون مرجعاً للمذاكرة والتدرب👇🏼.

🎞 تمارين على جزئية اللاب وطريقة حلها:

https://www.youtube.com/playlist?list=PLqNNCw8Czy0soSlg5zE9y_tpDu8rsUpTh

3️⃣ MEDICAL TERMINOLOGY:

المادة الي حتحسسكم إنكم فعلاً طالبات وطلاب تخصصات صحية😂❤️ حتتعلموا مفردات لغة الطب (أغلبها لاتيني) ومعناها بالانقليزي. تشبه الفوكاب ليست وتقريباً المادة كلها عبارة عن root, suffix, and prefix ومعانيهم لوحدهم وبعد كذا حتاخدوا كيف تستنتجوا المعنى لما تجمعوهم مع بعض، وكانت فيه لكتشر كلها أمراض وتعريفاتها بشكل مبسط.
المادة حلووة جدًا وإختباراتها بسيطة ومباشرة وكلها ١١ لكتشر لكن حتلاحظوا ان السلايدات فيها صور كثيرة وشوية أناتومي وهذا انتو غير مطالبين فيه والدكتورة حتقولكم وقت الكلاس.

 الكلاس غالباً حيكون قراءة للكلمة ومعناها لكن من رأيي الحضور مفيد لأن المس تنبه كثير إيش المطلوب مننا وإيش المحذوف، وكانت تعطينا SDL كثير(يعني مافي كلاس بس تقولنا حلّوا التمارين في البيت).

▪️كيف نذاكرها؟

 في البداية كنا نذاكرها يوم بيومه ومتحمسين لها بس بعدين غالباً حيكون وضعها زي مواد الانقلش ومع ضيق الوقت سرنا نذاكرها قبل الإختبار بكم يوم ويكفي مرة بالراحة ان شاءلله.

مصادر المذاكرة:
- سلايدات موحدة مع الرياض والأحساء.
- الكتاب The language of medicine + التمارين في نهاية كل شابتر (موجود في الدرايف)
- تدريبات خارجية تنزل على البلاك بورد ( review sheet - مهمة- أو بعضها تكون نفس الي في الكتاب)
- في الدرايف موجود فايل اسمه Quizzes

طبعاً أهم شيء السلايدات وتُعتبر كافية ومافي شيء يخرج منها ان شاءلله والكلمات الي فيها أصلاً مأخوذة من الكتاب بس مرتبينها على شكل سلايدات وفي الكتاب تكون جداول (لونها أخضر).
أنا شخصياً كنت ابدأ بالكتاب (مايحتاج تشتروه أبدا موجود PDF) لأن الكلمات نفسها وأحس الجداول تمشي معايا أسرع من السلايدات.. يعني ممكن تلقوا لكتشر تكون ٤٠ سلايدة مثلاً وفي الكتاب ملخصة في كم جدول.
🔸في اخر خانة عاليمين من جداول الكتاب حتلقوا فيها فراغات فاضية وحتلقوا اجاباتها في اخر كم صفحة من ملفات Quizzes الي في الدرايف، مفيدة لتثبيت المعلومة وقت المذاكرة.
🔸لو حبيتوا انكم تبدأوا بالكتاب فمهم جدًا ترجعوا للسلايدات لأن في كم لكتشر كانت اشياء كثير إضافية عن جداول الكتاب (غالباً المعلومات الإضافية تكون مذكورة في نصوص الكتاب لكن مو على شكل جداول).
🔸بعد المذاكرة اذا كفاكم الوقت فالأفضل إنكم تتدربوا على تمارين الكتاب نهاية كل شابتر أو إذا نزلوا لكم تمارين خارجية لتثبيت المعلومة.

💡 من الطرق المفيدة لهذي المادة يكون عندكم نوت بوك أو فايل في الآيباد تسجلوا فيه البريفكسز والسفكسز وأي شيء متشابه أو يصعب عليكم حفظه، الطريقة جدًا فعالة وتفيد كثير في التذكر.

4️⃣ COMPUTER SCIENCE:

للأمانة هذي المادة مالها علاقة كثير بتخصصاتنا وحسيتها مادة ناس متخصصين حاسب مو تخصصات طبية وكلها حففظ وتقريباً زي منهج الثانوي كله دش. حتاخذوا عن تاريخ الإنترنت والشبكات وأشياء كثير وفي آخر كم لكتشر حتدرسوا عن الطب والحاسب وأهمية الحاسب والشبكات في الطب ومن هذي المواضيع. دكاترة المادة لطيفييين مررة وكنا ننبسط وقت الكلاس معاهم.

▪️كيف نذاكرها؟

 مافي مصدر غير السلايدات وكااافية جداً، المادة حفظ في حفظ بس شرح الدكتورة يسهّل ربط المعلومات ببعض. غالبًا كنا نذاكرها في الويكند الي قبل الإختبار وصحيح السلايدات مليانة لكن كلها ٤ لكتشرز لكل ميد.
المنهج موحد بين الكل أبلايد ومدسن لكن ممكن يختلف التنسيق أو ترتيب السلايدات على حسب طريقة شرح كل دكتورة. الأفضل إنكم تشوفوا سلايدات مس خلود (كانت تدرس الأبلايد ومرة جانا سؤال موجود في سلايداتها بالنص وعندنا كان المصطلح مختلف).

▪️بالنسبة للاختبارات ماتخرج من السلايدات ان شاءلله وتقريباً كل الاسئلة مباشرة بس ميد٢ كان فيه ديتيلز أكثر من الأول. أما بالنسبة لجزئية الفاينل الجديدة كانت ٦ لكتشرز
🔴 وقت الفاينل اطلبوا منهم يخففولكم من الميدات وان شاءلله يسمعولكم.. في حال انهم مارضيوا زي ماحصل مع دفعتنا فلا تشيلوا هم ركزوا كثيرعلى اللكتشرز الجديدة لأنها مليانة كلام وحفظ، واللكتشرز القديمة غالباً ماحيجي منها إلا كم سؤال وسهلة وواضحة (المسز قالولنا) وأغلبنا عرفنا نحلها من غير لانذاكر الميدات.

▪️المادة فيها لاب💻 في معمل الكمبيوتر مرة وحدة في الأسبوع والكلاس ساعتين وعليه اختبار عملي في نهاية السمستر. بسييط وسهل مافيه صعوبة في البداية أخذنا عن برنامج ال Excel وبعدين عن الشبكات وكيف نسوي علاقة بينهم ونربطهم ببعض. احرصوا إنكم تاخذوا نوتس وقت الكلاس مع المس وتكتبوا الخطوات الي بتسويها لكل أوبجكتف عشان لاتضيعوا لما تجوا تتدربوا للإختبار، هما نزلوا لنا ملف فيه النقاط المطلوب مننا تنفيذها على الكمبيوتر بس مو كاتبين "كيف" ننفذها لذلك النوتس من رأيي مهمة جدًا وحتساعدكم كثير.

طريقة التقييم للاب كانت مختلفة تمامًا للبنات والأولاد، بالنسبة البنات :

كنا نُقيّم على اللاب على امتداد الترم، واختلفت أنواع التقييم:

•  بعض اللابات كنا نتقيم عليها في الكلاس مباشرة بعد شرحها لنا والأغلب يحصل على الدرجة الكاملة ( كأول لاب في المادة؛ عن الشبكات ) 

• وفي لابات أخرى كنا نحضر الشرح ثم نذاكر ونختبر في الأسبوع التالي (لابAlgorithms , Excel)

       كان سهل بعد التدريب، البعض لم يحصل على الدرجة الكاملة.

▪️في نهاية السمستر طلبوا مننا بروجكت قروبات (٤طالبات تقريباً في كل قروب) ونزلوا لنا على البلاك بورد ايش المطلوب مننا بالضبط والنقاط المطلوب تنفيذها لكن نفس الوضع ماكان مكتوب "كيف ننفذها" فغالباً المسز حيعملوا لكم كلاس لتوضيح طريقة عمل البروجكت ومهم تحضروا وتركزوا عشان لاتضيعوا فيه. ماكان صعب بس ضعنا شوية في البداية. احرصووا قد ماتقدروا تسووه أول ماتاخذوه حتى لو كنتو مضغوطين؛ لأنه حيكون قريب من الفاينلز تقريبًا وفي قروبات اتأخرت واضطروا يجلسوا لساعات متأخرة في الجامعة مع بعض لأن الشغل جماعي.

وفي آخر الترم كنا مطالبين بعمل project نعمل عليه كمجموعة من ٤-٥ طالبات على برنامج Access 

مهم التركيز في الكلاس لمعرفة كيفية عمل البرنامج نظراً لأنه غير مألوف بالنسبة لنا وغير مستخدم غالباً. وفي البلاك بورد كانت ترفق ملفات مساعدة على عمل المشروع. 

الخطوات كانت :

١- اختيار قائدة وأعضاء المجموعة

القائدة مسؤولة عن رفع أجزاء المشروع على البلاك بورد.

٢- اختيار موضوع وتصميم ERD ( entity-relationship diagram) 

ونقيم عليه ( طريقة عمله تعتمد على فهم ومذاكرة لكتشر رقم ٧ databases) ومهم فهم كيفية عمل الrelationships والدكتورة كانت متعاونة جداً حيث كنا نسألها ونتأكد منها.

٣- نصمم الdatabase نفسها ويجب على كل أعضاء المجموعة المشاركة. وأعيد الدكتورة كانت متعاونة ويمكنكم الاستفسار منها عن أي تساؤل.

لم تكن هناك كلاسات مخصصة للمشروع إذ وجب علينا البقاء أحياناً بعد الدوام الدراسي للعمل على المشروع حتى الساعة ٤ عصراً.

٤- تقيمنا الدكتورة وتسأل كل عضوة من المجموعة أسئلة معينة وإن جاوبتها تكون الدكتورة قد تأكدت من مشاركتها في تصميم المشروع وتمنحها الدرجة.

ملاحظة عن مشروع Access: بعض النقاط المطلوبة في المشروع لم تشرح لنا في الكلاس، واحتجنا البحث عنها في مصادر خارجية، وحين لم نستطع التوصل إلى حل تواصلنا مع دكتورة المادة.

5️⃣ BEHAVIORAL SCIENCES:

في هذي المادة حتاخدوا موضوعات كثير متنوعة تخص علم النفس وسلوك الإنسان. المادة متعتها على حسب مين يدرسها (كانوا يدرسونا كثير كل فترة مس جديدة، الأولاد يدرسهم د.أحمد الصالح) ، في البداية ممتعة مرة وقت الكلاس وكنا نفهم فالبتالي يسهل علينا الحفظ وربط المعلومات لكن مرت علينا كم لكتشر كلها قراءة والمطلوب مننا حفظ، والحفظ مو دايمًا يمشي لوحده بس يعني حطوا في بالكم لازم ربط ومنطق بجانب الحفظ.

أكبر صعوبة واجهناها في هذي المادة ان السلايدات غير موحدة بين الميل والفيميل وأحياناً الاسئلة تكون مذكورة عندنا بس عندهم لا وممكن العكس. الاسئلة ممكن تجي من كلام المسز والكيسز الي بيقولوها (دكاترة البنات والأولاد) فمهم مرة تكتبوا كلامهم وملاحظاتهم، لكن برضو في اسئلة مباشرة مرة وتجي دايركت من السلايدات.

▪️كيف نذاكرها؟

غالباً حتلقوا السلايدات فاااضية وخصوصاً على اللكتشرز الأخيرة يعني طبيعي تلقوا سلايدة مافيها إلا توبيك والمس بتقول كلام كثير مو مكتوب أصلا، وأحياناً سلايدات الأولاد تكون فاااضية بس حقتنا فيها كلام.. 

فالحل اللي اتوصلنا له ومشينا عليه: 

 1️⃣سوينا لجنة علمية لكتابة النوتس عند الأولاد والبنات لكلام الدكاترة 

 2️⃣وكنا نقارن سلايدات البنات والأولاد ونشوف الناقص.. يعني يحتاج تعاون بين الميل والفيميل بشكل كبير في دي المادة🙏🏼

كنا نذاكرها قبل الاختبار بوقت كافي ويمدي بالراحة ان شاءلله، ووقت الفاينل حذفولنا تقريباً ٣أو ٤  لكتشرز من بداية المنهج.

‏💡 mind maps جدًا مفيدة خصوصًا في لكتشرز مراحل الإنسان والنظريات.

🔴 مع كل لكتشر كانوا ينزلولنا جزئيات من الكتاب ويقولوا إنها معانا ولازم نذاكرها لكن أنا شخصياً ماعمري قرأتها وأشوفها غير مهمة واتوقع الأغلب زيي والحمدلله ماواجهت أي صعوبة في الاسئلة وماحتواجهوا ان شاءلله اذا ذاكرتوا كويس وركزتوا على كلامهم وشرحهم.

Batch 5&9:

بالنسبة لمادة البيهيفيور، كما ذكرت مودة حصل مع دفعة ٥ ذات الشيء. تم إرفاق جزئيات من الكتاب في البلاك بورد وذكر أنها مهمة لكن لم يأتي منها إلا سؤال واحد أو اثنين حسب ما أتذكر - وكان قد تم ذكره في المحاضرة من قبل الدكتورة -.

لم تكن لدينا سلايدات فارغة، لكن مع ذلك كان يأتي بعض من كلام الدكتورة لذا وجب عمل لجنة علمية لمقارنة الملاحظات ( النوتز خلال المحاضرة ) والسلايدات ذاتها - لوجود بعض الاختلافات -  لدى البنات والأولاد.

6️⃣ ELECTIVE 🔎:

صراحةً هذي أكثر مادة كنا ضايعيين فيها بالرغم من ان عليها ساعة واحدة لكن بعد ما أنتهيت منها أستوعبت إنها بسيطة..الضياع كان بسبب إننا موعارفين طريقة المادة وإيش وكيف المفروض نبدأ ننفذ المشروع، وأغلب المشرفات للأمانة ماكانوا متقنين لآلية المادة.

هي مهي مادة بحث حقيقي وتقريباً الهدف الأساسي منها هو إنهم يدربونا على الشغل الجماعي..بكل اختصار  عبارة عن اننا نختار موضوع ونحط أهداف له ونقرأ عنه بحوثات وأوراق علمية سابقة ونلخص النقاط الي نبغاها ونعيد صياغتها بأسلوبنا وبعد كذا نذكر المصادر ونصممه على شكل بوستر.

حأكتب لكم الخطوات بشكل عام وبعض الملاحظات والمواقع الي حتفيدكم. 

١- المادة مالها كلاسات في الجدول بس رسلوا لنا رسالة بموعد لكلاس تعريفي للمادة وكان مع الكوردينيتر مس ريم أو دكتورة رغد.. ونزلوا لنا guidelines على البلاك بورد وعروض بوربوينت تساعدنا. الكلاس كان عبارة عن رؤوس أقلام للخطوات الي حنمشي فيها وشفنا قروباتنا واتعرفنا على بعض. 

🔴 نزلولنا لستة بتقسيم القروبات (المدسن لحال والأبلايد لحالهم مو مشتركين) وال mentors المسؤولين عن كل قروب، للأسف ماكان بيدنا نختار قروباتنا ولا المسز.

٢-  بعد بأسبوع تقريباً كان في إجتماع مع المينتور لكل قروب والمفروض خلال هذا الأسبوع نبحث عن موضوع بحثنا (الأفضل تجيبوا أكثر من موضوع وتقرروا مع المس ايش الأنسب لكم ولها ويمديكم تطلبوا اقتراحات من المس نفسها). 

🔴 انتبهوا جداً لهذي الخطوة لأنها هيا الأساس. احرصوا مرة انكم تختاروا موضوع بسيط وله أوراق علمية كثير وبحوثات منشورة عشان لاتتعبوا ولاتاخذوا مواضيع دقيقة جداً أو مواضيع طبية بحتة وتعقدوا نفسكم. مارح يكون في وقت كافي إنكم تفهموا كل شيء وتبحثوا براحتكم.

٣- بعد ما أتفقنا على الموضوع الأساسي للبحث، بدأنا نحدد المواضيع الفرعية ونقسمها علينا بحيث كل فرد من القروب مسك جزئية إلى ما طلعنا ببحث كامل. 

٤- كل شخص بدأ يبحث عن جزئيته في مواقع علمية موثوقة ومنها https://scholar.google.com https://www.ncbi.nlm.nih.gov/pubmed/  أو كتب علمية ، وتختاروا الأوراق الي عجبتكم ولها صلة بموضوعكم. بعدها المس طلبت مننا نطبعهم ونسوي هايلايت على الجزئيات الي عجبتنا وملائمة لموضوع بحثنا، وبكل بساطة الي علينا كان إننا نمسك هذي الجزئيات نفهمها ونرجع نعيد كتابتها بأسلوبنا كأننا بنكتب براقراف رايتنق طبيعي وركزوا طبعاً على اللغة. 

٥- جمعنا جزئياتنا كلها في ورقة وحدة وكتبنا شيء شبيه بالمقدمة والخاتمة بالإضافة للمصادر وراجعنا أفكارنا مع بعض وكان هذا الFirst draft، وبعد التعديل كان ال final draft. واخر شيء رجعنا نسقنا كلامنا على هيئة ورقة علمية، نزلوا لنا نموذج على البلاك بورد وكل الي علينا اننا ننسخ كلامنا ونلصقه بدال الكلام المكتوب في النموذج. 

٦- اخر شيء صممنا البوستر على البوربوينت وطبعناه في المكتبة وكانوا كاتبين لنا المقاسات المطلوبة وكل شيء في الملفات الي نزلوها لنا من البداية. 

٧- نجي ليوم البرزنتيشن. ضروري جداً تتدربوا مع بعض كقروب  وترتبوا أدواركم وكيف كل وحدة حتشرح جزئيتها وقيموا نفسكم ونبهوا بعض على أغلاطكم. التقييم يعتمد على الدكتورة وماكنا عارفين مين بالضبط الي حيقيمنا، يعني حتكونوا واقفين وحيمروا عليكم كذَا دكتورة ووحدة منهم الي حتقيم. ممكن يسألوكم اسئلة تخص البحث بعد ماتنتهوا وعادي لاتتوتروا جاوبوهم على قد ماتعرفوا وان شاءلله حيكونوا مقدرين وضعنا ومتساهلين معانا. 

خلوا في بالكم انو كل هذا حيسير في وسط ضغط السمستر والاختبارات بس الحمدلله اغلبنا جاب الA+ فيها.  التقييم حيكون على الورقة وكمان البرزنتشن فلاتهملوا واحد منهم.

🔴 الخطوات الي كتبتها فوق مشينا عليها انا وقروبي شخصياً (من باتش٤ بنات) ممكن تكون في اختلافات بسيطة للقروبات التانيه على حسب المينتور وطريقتها لكن عالأقل خذوا فكرة عن طريقة المادة ككل🙏🏼

https://sci-hub.tw 🔴

موقع مفيد يسمح لنا نشوف الأوراق العلمية كاملة.

7️⃣ English:

🔹بالنسبة لمواد الانقليزي ما أتوقع يحتاج أتكلم عنها كثير، بس الفرق إن الرايتنق والقرامر يعتبروا مادة وحدة ودرجاتهم كمادة وحدة. 

القرامر سهل وما أتذكر واجهنا فيه صعوبة. الرايتنق ماعليه اختبارات ميدات يعني المطلوب بس أسايمنتس وكانت ٣ ومافي شيء جديد أبدًا بس اللهم بدال ماتكتبوا paragraph حيسير essay؛ كأنكم بتجمعوا أكثر من paragraph مع بعض، بس انتبهوا لتقسيمة الدرجات لأن الأسايمنت الواحد كان عليه كثير خصوصًا آخر أسايمنت.  

الريدنق كانت مصادر مذاكرته كثيرة وموجودة في الدرايف لكن أتوقع حيسير تغييرات على سنتكم لأن كتاب ال prefixes& suffixes الي اخذتوه سمستر٢ احنا اخذناه سمستر٣، فالأفضل تنتظروا وتشوفو ايش حيسير بنفسكم.

الكلاسات طويلة وتطفش صراحةً خصوصًا الرايتنق أغلببو إعادة وتكرار🤷🏻‍♀️

Batch 5&9:

الاختلاف في مادتي الرايتنق والريدنق: 

Reading:  

كان من كتابين، كتاب ريدنق طبي وآخر عام.

وكذلك قائمة الكلمات كانت منفصلة لكل كتاب وترفق في البلاك بورد.

بالنسبة للكتاب الطبي؛ كانت هناك أيضاً بعض الكلمات داخل الكتاب وكنا مطالبين بها وفي نهاية الترم بدأوا إرفاقها في قائمة الكلمات السابقة في البلاك بورد للتسهيل. 

لذا كانت المصادر كالتالي:

١- قائمة كلمات لكتاب الريدنق العام

٢- قائمة كلمات لكتاب الريدنق الطبي

٣- بعض الكلمات داخل الكتاب والتي أرفقت في قائمة الكتاب الطبي السابقة نهاية الترم.

والأهم لا توجد suffixes , prefixes

وتم إضافة كتيب ( Booklet of Charts ) حيث كان يحتوي على رسوم بيانية تليها بعض الأسئلة عن الرسم البياني ولم نقم بحله كله إنما بعض الأجزاء ولم يكن من الضروري العودة له قبل الاختبارات - إلا في حال الرغبة في التدريب - عدا ذلك لا شيء كان يحفظ منه - فقط فهم الطريقة، وكانت تأتينا أسئلة بذات الطريقة في الاختبارات . -

Writing:

كان للمادة كتاب نستخدمه في الكلاس. للأمانة لم تكن له أدنى فائدة.

طلبوا من بعض الكلاسات حل عدة واجبات ووضعها في ملف لكن ألغوا الفكرة في النهاية.

كنا مطالبين بعمل ٤ أساينمنتز، فاينل بروجكت، كويز، واختبار نهائي. 

الأساينمنت مختلفة تماماً عن السنة التحضيرية: 

في البداية طُلب منا اختيار موضوع عام والبحث عن مقالة علمية لنفس الموضوع المختار من مصدر موثوق - سيتم إعلامكم حينها عن المواقع الموثوقة-بعدة شروط كأن يكون لها methods إلى آخره. ويمنع اختيار المقالات من نوع review.

مثلاً اخترت موضوع Alzheimer Disease، وبحثت عن مقالة مقترنة بهذا الموضوع.

 وبعد الموافقة على مقالتكم ستبدأون بعمل الأساينمنتر. 

1- Note-Making - in class assignment 

لنفس المقالة التي تم اختيارها، نقوم بتلخيص أهم النقاط على هيئة رؤوس أقلام وبطريقة معينة تتدربون عليها قبل موعد الأساينمنت. من المهم الاهتمام بتلخيص النقاط المهمة بطريقة مرتبة حيث ستستخدمون ملاحظاتكم في الأساينمنت التالي.   

2- Article summary - in class assignment 

بعد تصحيح الأساينمنت السابق، تعود إليكم ملاحظاتكم + المقالة العلمية. التلخيص كان يختلف باختلاف الدكتورة، البعض في باراقراف واحد والبعض يطلب تجزئتها بحسب عناوين المقالة، وعدد الكلمات يختلف كذلك.

3- Summary of survey results - in class assignment 

ترسل لنا مقالة جديدة من اختيار الدكتورة. نقوم بقرائتها في المنزل ثم نعود في يوم التالي ونكتب التلخيص + كما ذكرت مسبقاً تختلف الطريقة باختلاف الدكتورة.

4- Editing and revising - take home

يوزع علينا الأساينمنت الثاني ( الملخص لمقالتنا المختارة ) ونقوم بتصحيحها وتحسينها بأنفسنا في المنزل، ثم نبدل مع زميلة ونصحح لبعضنا البعض خلال الكلاس وعند الانتهاء نكتب final draft بكل التصحيحات الملائمة. وحتى من حصل على الدرجة الكاملة في الأساينمنت الثاني لابد له من إيجاد "تحسينات" حتى يحصل على الدرجة لهذا الأساينمنت. 

5- Referencing quiz - in class 

في الكلاس، شرح لنا طريقتيّ APA, Vancouver. 

أُرفقت ملفات في البلاك بورد للمذاكرة منها.

ثم كويز في الكلاس - لا تتهانوا لأنه يتطلب حفظ وليس خبرة، الفرق بين referencing styles قد يكون بسيط جداً ويجب التركيز. 

6- Final project - take home 

نكتب عن الموضوع المختار في بداية الترم، كما ذكرت موضوعي كان Alzheimer disease. والأساينمت عبارة عن عدة أقسام:

A) Introduction:

لماذا اخترت هذا الموضوع؟ وماذا يهمني فيه؟ بطريقة قصصية Narritive 

B) Summary of task 2 - summary of your summary -:

نقوم بتلخيص المقالة المختارة في assignment 2 أكثر ونضعها في باراقراف منفصل مع citation

C) Discussion نناقش فيه المقالة ونقاط القوة والضعف من وجهة نظركم 

D) Conclusion نناقش فيه موضوعنا ونغلقه

E) Reference for the citation in - B - 

F) Summary of task 3 

الاختبار النهائي : تلخيص مقالتين أكاديميّتين إحداهما علمية والأخرى عامة. وبعض الأسئلة المصاحبة ( paraphrasing some underlined sentences, reference question - to what does them refer-, find synonyms for ..etc) 

وسيتم توفير تمارين للتدرب على طريقة الفاينل حينها بإذن الله.

بشكل عام، لاحظت عدم التدقيق في الأخطاء الإملائية والنحوية والكلمات كما في السنة التحضيرية.

____________

تم بحمدلله🌟..

💡 أنوّه ان كل ماذُكر كان بناءً على تجربتي ولدفعتي Batch4&8.. وممكن يختلف الوضع في بعض النقاط الي ذكرتها على الدفعات القادمة.

كل ماكُتب بهذا اللون فهو من تجربة Batch 5&9 ، والشكر لـِ غدي الحربي، وكل من ساعدها: ضيّ الراشد، وعبدالعزيز الراشد. 🙏🏼

 إن أصبت فمن الله وإن أخطأت فمن نفسي والشيطان، ان شاءلله أكون نقلت لكم التجربة على أكمل وجه وبكل واقعية.. واسأل الله لي ولكم التوفيق ولا تنسوني من صالح دعاؤكم❤️

أختكم/ مودة هشام الصائغ، اي استفسار أو تعليق هذا حسابي في تويتر والخاص مفتوح لكم جميعاً ✨ 

Twitter: @mawalsaegh